Дар Тоҷикистон маъракаи қабули эъломияи андоз оғоз шуд

Январь 27, 2022 12:42

ДУШАНБЕ, 27.01.2022 /АМИТ «Ховар»/. Кумитаи андози назди Ҳукумати Ҷумҳурии Тоҷикистон маъракаи қабули эъломияи андоз барои соли 2021-ро оғоз кардааст. Бар асоси қонун, хизматчиёни давлатии мамлакат, ки имрӯз ҳудуди 20 ҳазор нафаранд, вазифадоранд ҳамасола то аввали моҳи апрел дар бораи даромади солона ва манбаи аслии худ ба мақомоти андоз ҳисобот диҳанд.

Хизматчиёни давлатии Тоҷикистон 17 сол пеш пешниҳод намудани эъломияи даромади худро шурӯъ намуданд. Қаблан дар эъломияи вазъи амвол ба ғайр аз амволи ғайриманқул ва мошинҳо онҳо бояд саршумори чорво, паранда, пасандоз, металлу сангҳои қиматбаҳоро низ нишон медоданд.

Ҳукумати Тоҷикистон бо қарори худ аз 24 июли соли 2020 шаклҳои нави эъломияи даромад ва амволи хизматчиёни давлатиро қабул намуда, онҳоро вазифадор кард, ки даромад аз фаъолияти илмӣ, эҷодӣ ва омӯзгорӣ, даромад аз амвол ва замини ба иҷора додашуда, даромад аз қитъаи наздиҳавлигӣ, инчунин даромад аз пасандозҳои бонкӣ ва коғазҳои қиматнокро нишон диҳанд.

Барои осон намудани пешниҳоди эъломия Кумитаи андози назди Ҳукумати Тоҷикистон чанде пеш барномаи махсуси компютерӣ таҳия ва роҳандозӣ намуд, ки он имкон медиҳад эъломияҳо ба таври электронӣ пешниҳод шаванд.

Дар сомонаи расмии кумита andoz.tj «Ҳуҷраи шахсии андозсупоранда» мавҷуд аст, ки тартиби пешниҳоди эъломияи даромади хизматчиёни давлатии Тоҷикистонро осон мекунад. Инчунин ҳамаи шаҳрвандоне, ки дар ҳамин захираи интернетӣ сабти ном шудаанд, метавонанд аз ин манбаи иттилоотӣ тамоми маълумот ва ҳуҷҷатҳои заруриро ҷамъоварӣ ва бевосита ба Кумитаи андоз супоранд.

Дар Кумита хотиррасон намуданд, ки тибқи қонунгузории Тоҷикистон, тамоми хизматчиёни давлатӣ ва инчунин шаҳрвандони мамлакат, ки хизмати давлатӣ маҳсуб мешаванд, бояд ин қоидаҳоро риоя кунанд. Сабаби аз хизмати давлатӣ озод кардан ё рад кардани қабул ба хизмати давлатӣ метавонад дар эъломияи пешниҳодшуда нодурустии маълумот ё ба мақоми андоз пешниҳод нашудани эъломияи даромад бошад.

   АКСҲО: Тоҳир Саидов/АМИТ «Ховар»

Январь 27, 2022 12:42

Хабарҳои дигари ин бахш

Дар Тоҷикистон таҳияи Стратегияи рушди дарозмуддат бо сатҳи пасти партовҳои камкарбон оғоз мешавад
Байни «Сомон Эйр» ва ширкати чинии «Shanghai Haizhu Engineering & Design Group» Ёддошти ҳамкорӣ ба имзо расид
ДАРАХТ БИНШОН! Аз охири моҳи ноябр дар Тоҷикистон маъракаи ниҳолшинонӣ оғоз мешавад
РУШДИ САЙЁҲӢ. Беш аз 90 ҳазор сайёҳон шаҳри бостонии Кӯлобро тамошо намуданд
Масъалаи баланд бардоштани самаранокии раванди татбиқи лоиҳаҳо дар Тоҷикистон бо Бонки исломии рушд баррасӣ гардид
«TEIECOM AWARDS TAJIKISTAN – 2025». Барои баҳодиҳӣ ба фаъолияти операторони алоқаи барқӣ озмун гузаронида мешавад
Дар Арабистони Саудӣ татбиқи лоиҳаҳо дар самтҳои энергетика ва рушди деҳот дар Тоҷикистон баррасӣ гардид
Ба барномаҳои таълимии 10 донишгоҳи Тоҷикистон ихтисоси «зеҳни сунъӣ» ворид карда шуд, — бардошт аз Конфронси байналмилалӣ
Дар ноҳияи Спитамен маъракаи пахтачинӣ идома дорад
Форуми байналмилалии Тоҷикистону Эрон таҳти унвони «Пули эътимод ва рушд» баргузор шуд
Дар Ҷидда лоиҳаҳои афзалиятноки Тоҷикистон бо Бонки исломии рушд баррасӣ гардид
Вазорати молияи Тоҷикистон ва Созмони коғазҳои қиматнок ва биржаҳои Эрон ҳамкориро тақвият мебахшанд