Достони «Лайлӣ ва Маҷнун» бори аввал ба забони кореягӣ тарҷума ва дар Сеул нашр шуд

ДУШАНБЕ, 18.02.2022 /АМИТ «Ховар»/. Достони «Лайлӣ ва Маҷнун»-и шоир ва мутафаккири бузурги тоҷику форс Низомии Ганҷавӣ бори нахуст ба забони кореягӣ тарҷума ва дар Сеул нашр шуд, хабар медиҳад АМИТ «Ховар» бо истинод ба хабаргузории АЗЕРТАҶ.

Дар тарҷумаи он профессори Донишгоҳи Ҳосеи Ҷумҳурии Корея Ким Сеонг-Ренг ва устоди ин донишгоҳ Рамин Абосов кор кардаанд. Тарҷумаи шеър бо назардошти ҳадди аксари хусусияти забонии асрҳои миёна, бо мутобиқсозӣ ба забони кореягӣ анҷом дода шудааст. Барои муфассалтар ва осонтар фаҳмидани асар аз ҷониби хонандагон дар нашрия шарҳҳои сершумори тавзеҳотӣ оид ба истилоҳоти асримиёнагӣ, инчунин миниатюраҳои як қатор саҳнаҳои шеъри «Лайлӣ ва Маҷнун» илова карда шудаанд.

Илова бар ин, дар китоб доир ба ҳаёт ва фаъолияти Низомии Ганҷавӣ, инчунин вазъи иҷтимоию сиёсии минтақае, ки шоири бузург дар асрҳои 12-13 зиндагӣ ва эҷод кардааст, дар бораи давлатҳои дар ҳамин вақт мавҷудбуда ва давлатдорон маълумоти муфассал оварда шудааст.

Низомии Ганҷавӣ — классики бузурги адабиёти тоҷику форс, шоири лирик, ки дар назми эпикии ҷаҳонӣ саҳми бебаҳо гузоштааст, муаллифи ашъори пур аз романтизм ва тасаввуф мебошад, ки дар шаҳри Ганча таваллуд щуда, дар он зиндагӣ ва вафот кардааст.

Эҷодиёти ӯ ба шоирони бузурге, чун Ҳофизи Шерозӣ, Ҷалолиддини Балхии Румӣ ва Саъдӣ таъсир кардааст. «Хамса»-и ӯ (панҷ маснавӣ ё достон) мавзӯъҳои мухталиферо аз бахшҳои мухталифи дониш ошкор ва таҳқиқ намуда, шуҳрати зиёд касб кардааст. Қаҳрамонони ин достон — Лайлӣ ва Маҷнун, Хусрав ва Ширин, Искандар то имрӯз ҳам дар ҷаҳони ислом ва дар мамлакатҳои дигар маъруфанд.

ЮНЕСКО соли 1991-ро дар саросари ҷаҳон ба ифтихори 850-солагии шоир Соли Низомӣ ва соли 2021-ро дар Озарбойҷон «Соли Низомии Ганҷавӣ» ва таҷлили 880-солагии шоири бузург эълон карданд, ки он на танҳо дар Озарбойҷон, балки дар Тоҷикистон, Русия, Беларус, Эрон, Покистон, Туркия низ ҷашн гирифта шуд.

АКС: АЗЕРТАҶ