Гурӯҳи корӣ таҳти роҳбарии муовини Сарвазир Матлубахон Сатториён ба шаҳру ноҳияҳои минтақаи Рашт сафар намуд

ДУШАНБЕ, 10.02.2022. /АМИТ «Ховар»/. Имрӯз сафари гурӯҳи кории ҳукуматӣ таҳти  роҳбарии муовини Сарвазири Ҷумҳурии Тоҷикистон Матлубахон Сатториён ба шаҳру ноҳияҳои минтақаи Рашт оғоз гардид. Ба ҳайати гурӯҳи  мазкур роҳбарияти вазоратҳои фарҳанг, маориф ва илм, тандурустӣ ва ҳифзи иҷтимоии аҳолӣ, меҳнат, муҳоҷират ва шуғли аҳолӣ, кумитаҳои оид ба корҳои дин, танзими анъана ва ҷашну маросим, кор бо занон ва оила, кор бо ҷавонон ва варзиш шомиланд, хабар доданд ба АМИТ «Ховар» дар Вазорати фарҳанги мамлакат.

Гурӯҳи корӣ бо мақсади иҷрои дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон аз вазъу ҳолат ва фаъолияти муассисаҳои фарҳангию фароғатӣ, таълимӣ, тандурустию солимгардонӣ, қасру хонаҳои фарҳанг, китобхонаю осорхона, мактабҳои санъату мусиқӣ, мактаб-интернатҳо, инчунин, муассисаҳои нав сохташаванда дидан намуда, барои беҳбуд бахшидан ба фаъолияти онҳо тавсияву дастурҳои мушаххас манзур менамоянд.

Сафари хизматии гурӯҳи корӣ ба шаҳру ноҳияҳои минтақаи Рашт идома меёбад.

АКС: Вазорати фарҳанги Ҷумҳурии Тоҷикистон