Соли 2021 ба хазинаи варзишии Тоҷикистон 103 медали тилло ворид гардид

ДУШАНБЕ, 11.02.2022. /АМИТ «Ховар»/. Соли сипаришуда 966 нафар варзишгарони тоҷик дар мусобиқаҳои сатҳи байналмилалӣ дар хориҷ аз кишвар ва дохили мамлакат иштирок намуда, ба хазинаи варзишии мамлакат 398 медал ворид намуданд. Аз ин шумора 103 адади онро медали тилло ташкил медиҳад. Ин нуктаро имрӯз зимни нишасти матбуотӣ раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Абдулло Раҳмонзода ба хабарнигорон  баён дошт.

Тазаккур дода шуд, ки бо мақсади муаррифии варзиши тоҷик ва Ҷумҳурии Тоҷикистон 966 нафар варзишгарони ҳайати дастаи мунтахаби мамлакат дар мусобиқаҳои байналмилалӣ ширкат варзида, ҳамчунин 121 медали нуқра ва 174 биринҷӣ ба даст овардаанд.

Зикр шуд, ки Ҳукумати мамлакат бо мақсади дастгирӣ ва ҳавасмандгардонии ҷавонони лаёқатманду соҳибмаърифат ва ватандӯсту хештаншинос, яъне насли ояндасози миллат ва давлат дар сӣ соли соҳибистиқлолӣ тамоми шароиту имконияти заруриро фароҳам овардааст.

Ин аст, ки дар муддати ду даҳсолаи охир бо дарназардошти муҳим будани рушди инфрасохтори соҳа бунёду навсозии ҳазорон иншооти варзишӣ амалӣ гардид.

Аз ҷумла, ба ҳолати 1 январи соли 2021 дар қаламрави ҷумҳурӣ мувофиқи маълумоти оморӣ, 10 218 иншооти варзишӣ, новобаста аз шакли моликияташон ба қайд гирифта шудаанд.

Яке аз ин иншооти варзишӣ дар шаҳри Душанбе Маҷмааи универсалии варзишӣ  мебошад, ки  мутобиқ ба талаботи стандартҳои бозиҳои олимпӣ  сохта шудааст.

Маҷмааи бузурги универсалии варзишии пойтахт аз 3 то 5 ошёна иборат буда, тибқи лоиҳа  толорҳову  майдонҳои гуногуни варзишии он барои аз 150 то 3000 ҷойи нишаст пешбинӣ шудаанд.  Иншоот аз қасрҳои варзишии болопӯшидаву  нимпӯшида, майдону майдончаҳои гуногун барои теннис, ҳавзҳои хурду миёна ва бузург барои шиноварӣ, инчунин дигар намудҳои варзиши обӣ иборат буда, барои гузаронидани мусобиқаҳои байналмилалӣ бо навтарин стандартҳои ҷаҳонӣ сохта шудааст.

Зимни ифтитоҳи маҷмааи мазкур 27 июли соли 2020 Сарвари давлат иброз доштанд, ки ҳадафи асосии мо аз амалӣ кардани сиёсати давлат дар соҳаи ҷавонон ва варзиш, пеш аз ҳама, тарбия намудани насли худшиносу худогоҳ, донишманду созанда, соҳибмаълумоту соҳибкасб, аз лиҳози ҷисмониву маънавӣ обутобёфта ва бо ҳамин роҳ ба вуҷуд овардани заминаи боэътимод барои ҷомеаи ояндаи Тоҷикистон мебошад.

«Мо бо наврасону ҷавонони имрӯза, яъне насли замони истиқлолу озодии Ватанамон ифтихор мекунем ва барои онҳо тамоми шароиту имконоти муосирро муҳайё месозем», — изҳор доштанд Пешвои миллат.

АКСҲО: АМИТ «Ховар»