Тоҷикистон барои иштирок дар назорати раъйпурсии Беларус даъватнома гирифт

ДУШАНБЕ, 02.02.2022 /АМИТ «Ховар»/. Тоҷикистон чун дигар кишварҳои ИДМ барои иштирок дар раъйпурсии конститутсионии Беларус даъват шудааст. Дар ин бора дирӯз, 1 феврал раиси комиссияи марказӣ оид ба интихобот ва гузаронидани раъйпурсии ҷумҳуриявии ҶБ Игор  Карпенко (ДАР АКС) изҳори назар намудааст, хабар медиҳад АМИТ «Ховар» бо истинод ба Агентии давлатии иттилоотии ин кишвар «БелТА».

Минск аллакай ба намояндагони КМИ Озарбойҷон, Арманистон, Қазоқистон, Қирғизистон, Молдова, Русия, Туркманистон, Тоҷикистон ва Узбекистон нома ирсол кардааст. Ба гуфтаи Игор Карпенко, КМИ нозиронро дар асоси даъват аккредитатсия мекунад. Тибқи иттилои КМИ Беларус, то имрӯз беш аз 870 нозири миллӣ аз ҷониби комиссияҳои ҳудудии раъйпурсӣ аккредитатсия карда шудаанд.

Ёдовар мешавем, ки раъйпурсии конститутсионӣ 27 феврали соли 2022 доир мегардад. Илова бар ин, аз 22 то 26 феврал пеш аз муҳлат овоз додан ҳам мумкин аст.

Аз рӯи натиҷаҳои овоздиҳӣ интизор меравад, ки қариб ба нисфи моддаҳои қонуни асосии мамлакат тағйирот ворид карда шавад.

Моҳияти тағйирот дар он ифода меёбад, ки дар Беларус шакли президентии ҳукумат нигоҳ дошта шуда, вазифа ва ваколатҳои сарвари давлат, инчунин парлумон ва ҳукумат бояд мушаххас карда шаванд.

Ин тағйирот метавонанд ба васеъ намудани ваколатҳои идораи вазирон ва мустақилияти он дар қабули қарорҳо дахл дошта бошанд, инчунин Анҷумани умумихалқии Беларусро ба мақоми  конститутсионӣ табдил дода, ба он масъулияти иловагӣ ҳамроҳ намоянд.

                                        АКС аз манбаъҳои боз