Ҷиҳати дар сатҳи баланд баргузор намудани Чемпионати Осиё оид ба велосипедронӣ дар Душанбе ҷаласаи кумитаи тадорукот доир шуд

ДУШАНБЕ, 15.03.2022. /АМИТ «Ховар»/. Тавре қаблан иттилоъ дода будем, аз 25 то 29 март бо дастгирии бевоситаи Раиси шаҳри Душанбе муҳтарам Рустами Эмомалӣ нахустин маротиба Чемпионати Осиё оид ба велосипедронӣ дар шоҳроҳ миёни наврасон, ҷавонон, калонсолон, бонувон ва шахсони имконияташон маҳдуди кишварҳои минтақаи Осиё баргузор карда мешавад, ки вобаста ба ин бо роҳбарии раиси кумитаи тадорукот, муовини якуми Раиси шаҳри Душанбе Ҷамшед Табарзода ҷиҳати дар сатҳи баланди ташкилӣ баргузор намудани ин мусобиқа ҷаласаи ҳайати кумитаи тадорукот баргузор гардид.

Тавре аз шуъбаи иттилотии дастгоҳи Раиси шаҳри Душанбе хабар доданд, мақсад аз баргузор намудани мусобиқаи мазкур- ин омода намудани варзишгарони муваффақ ва дарёфти чеҳраҳои нав барои иштирок дар мусобиқаҳои сатҳи баланд, тарғибу ташвиқи тарзи ҳаёти солим, баланд бардоштани маҳорату малакаи варзишии иштирокдорон, муаррифии фарҳангу тамаддун, имконияти сайёҳӣ ва оммавияту солимгардонӣ мебошад.

Роҳбари кумитаи тадорукот зикр намуд, ки ин навбат низ бо дастгирии бевоситаи Раиси шаҳри Душанбе муҳтарам Рустами Эмомалӣ ҷиҳати дар сатҳи баланд доир намудани мусобиқа нақшаи чорабиниҳои мақомоти иҷроияи ҳокимияти давлатии шаҳри Душанбе ба тасвиб расида, тибқи он вазифаҳо барои дар сатҳи зарурӣ гузаронидани мусобика ба масъулин пешниҳод карда шудааст. Аз ин рӯ, аз масъулин талаб карда мешавад, ки нисбат ба он масъулияти ҷиддӣ зоҳир намуда, баҳри амалӣ намудани дастуру супоришҳои Раиси шаҳри Душанбе муҳтарам Рустами Эмомалӣ тадбирҳои саривақтӣ андешанд.

АКСҲО: шуъбаи иттилоотии дастгоҳи Раиси шаҳри Душанбе