«ҶОМИ НАВРӮЗ-2022». Дастаи мунтахаби футболи Тоҷикистон дар Намангон бо дастаи Уганда бозӣ мекунад

ДУШАНБЕ, 02.03.2022 /АМИТ «Ховар»/. Дастаи мунтахаби футболи Тоҷикистон таҳти раҳбарии мутахассиси хорватӣ Петр Сегрт дар мусобиқаи байналмилалии «Ҷоми Наврӯз-2022», ки аз 25 то 29 март дар шаҳри Намангони Узбекистон баргузор мешавад, ширкат хоҳад кард. Дар ин бора АМИТ «Ховар» бо истинод ба Федератсияи футболи Тоҷикистон хабар медиҳад.

Дар «Ҷоми Наврӯз-2022» чаҳор дастаи миллӣ — Тоҷикистон, Узбекистон, Қирғизистон ва Уганда ширкат мекунанд.

Дар даври ½-ниҳоии мусобиқот дастаи мунтахаби Тоҷикистон 25 март бо дастаи миллии Уганда бозӣ мекунад. Дар бозии дигари нимниҳоӣ ҳамон рӯз дастаҳои Узбекистон ва Қирғизистон вомехӯранд.

Ғолибони даври нимниҳоӣ дар даври ниҳоии «Ҷоми Наврӯз-2022» ва мағлубшудаҳо дар бозӣ барои ҷойи сеюм рақобат мекунанд.

Ташкилкунандаи «Ҷоми Наврӯз-2022» Ассотсиатсияи футболи Узбекистон мебошад.

Мусобиқаи байналмилалии «Ҷоми Наврӯз-2022» 

Нимфинал 

25 март (ҷумъа)

16:00 — Уганда — ТОҶИКИСТОН

20:00 — Узбекистон — Қирғизистон

29 март (сешанбе)

16-00 — Бозӣ барои ҷойи сеюм

20-00 — Финал

Эзоҳ: Ҳама бозиҳо дар Варзишгоҳи марказии Намангон баргузор мешаванд.

АКС: ФФТ