Дар ҷануби Тоҷикистон сатҳи ҷинояткорӣ 36,1% коҳиш ёфтааст

ДУШАНБЕ, 08.04.2022 /АМИТ «Ховар»/. Дар семоҳаи аввали соли равон дар вилояти Хатлон сатҳи ҷинояткорӣ  ба таври назаррас коҳиш ёфтааст. Дар ин бора дар суҳбат бо хабарнигори АМИТ «Ховар» прокурори вилояти Хатлон Абдураҳим Раҳимзода хабар дод.

Ба гуфтаи вай, дар муқоиса бо соли гузашта ҳолати  ҷинояткорӣ 36,1% коҳиш ёфтааст. Сабаби коҳишро вай тақвият додани корҳои пешгирикунанда миёни аҳолӣ номид.

«Ба назорат аз болои иҷрои қонунгузории замин диққати махсус дода шуда, барои оқилона ва самаранок истифода бурдани он назорати қатъӣ бурда  мешавад. 9,98 гектар заминҳои худсарона ишғол ва дар онҳо иморат бунёдшуда ба давлат баргардонида шуданд», — гуфт ҳамсуҳбати мо.

Тавре прокурори вилоят гуфт, ба пешгирии ҷинояткорӣ миёни ноболиғон ва ҷавонон таваҷҷуҳи хосса зоҳир карда мешавад. «Дар моҳҳои аввали имсол дар муассисаҳои таълимии вилояти Хатлон 69 санҷиш гузаронида шуда, дар натиҷа аз ҷониби мақомоти прокуратура 717 санад тартиб дода шуд», — афзуд ӯ.

 АКС: АМИТ «Ховар»