Дастаи «Истиқлол»-и Душанбе барои бозӣ бо дастаи «Ал-Раён»-и Қатар омодагӣ мебинад

ДУШАНБЕ, 07.04.2022 /АМИТ «Ховар»/. Дастаи футболи «Истиқлол»-и шаҳри Душанбе ҷиҳати омодагӣ ба бозиҳои марҳилаи гурӯҳии Лигаи қаҳрамонҳои Осиё тамринҳояшро дар варзишгоҳи шаҳри Риёз доир карда истодааст. Ба ҳайати даста 20 футболбоз ҷалб гардидаанд, ки аксари онҳо футболбозони ҷадиди ин бошгоҳ маҳсуб мешаванд,иттилоъ медиҳад шореҳи варзиши АМИТ «Ховар» бо истинод ба Федератсияи футболи Тоҷикистон.

Дастаи футболи «Истиқлол»-и шаҳри Душанбе шомили гурӯҳи «А» буда, дар онҷо бо дастаҳои футболи «Ал-Шарҷа», «Ал-Ҳилол» ва «Ал –Раён» рақобат мекунад. Ҳамаи бозиҳо дар Арабистони Саудӣ баргузор мегарданд. 8 апрел, соати 22:15 ба вақти Душанбе дар доираи бозиҳои даври аввали гурӯҳи дастаи футболи «Истиқлол»-и шаҳри Душанбе бо дастаи «Ал-Раён» аз Қатар сабқат мекунад.

Капитани дастаи футболи «Истиқлол»-и шаҳри Душанбе Манучеҳр Ҷалилов қабл аз бозӣ бо дастаи «Ал Раён»-и Қатар гуфт, ки «мо хело хурсандем, ки дар инҷо қарор дорем ва бесаброна оғози мусобиқаро интизорем. Мо ба бозиҳои марҳилаи гурӯҳӣ омодагии хуб дидаем ва боварӣ дорем, ки он ҳатман натиҷа медиҳад. Вазъи бозигарон хеле хуб аст. Ҳама ба таври ҷиддӣ ба вохӯриҳо омодаанд. Имсол сарфи назар аз он ки комилан ҳайати даста нав шуд, албатта, вазифаи ҳар кадоми мо ин аст, ки аз гурӯҳ бароем».

Хотиррасон мекунем, ки дастаи футболи «Истиқлол»-и шаҳри Душанбе шомили гурӯҳи «А» буда, 8 апрел бо дастаи «Ал-Раён»-и Қатар аввалин вохӯриашро доир мекунад.

Бозӣ дар Арабистони Саудӣ доир мегардад.

АКСҲО: ФФТ