ДАЪВАТИ БАҲОРӢ. Дар даҳ рӯзи аввал ин маъракаи сиёсӣ дар Тоҷикистон ба қадри 40 фоиз таъмин шуд

ДУШАНБЕ, 12.04.2022 /АМИТ «Ховар»/. Аз якуми апрел дар тамоми шаҳру навоҳии Тоҷикистон даъвати баҳории шаҳрвандон ба хизмати ҳатмии ҳарбӣ оғоз гардида, аллакай давоми даҳ рӯзи ҷараёни ин маъракаи муҳими сиёсӣ иҷрои нақша дар қаламрави ҷумҳурӣ 40 фоизро ташкил дод, хабар доданд ба мухбири АМИТ «Ховар» дар Вазорати мудофиаи Ҷумҳурии Тоҷикистон.

Тавре иттилоъ дода шуд, чор соли охир аст, ки миёни вилоятҳо ва шаҳру ноҳияҳои мамлакат  Вилояти Мухтори Кӯҳистони Бадахшон дар нахустин рӯзи даъвати шаҳрвандон иҷрои нақшаро ба 100 фоиз баробар менамояд.

Давоми даҳ рӯзи идомаи чорабиниҳои даъватии шаҳрвандон ба хизмати ҳарбӣ аз 25 шаҳру навоҳии вилояти Хатлон то ин дам ноҳияҳои Шамсиддини Шоҳин, Носири Хусрав ва Фархор нақшаи даъватро ба итмом расонида, иҷрои нақшаро дар қаламрави ин вилоят ба 40 фоиз баробар намудаанд.

Дар шаҳру навоҳии вилояти Суғд низ ин маъракаи муҳими сиёсӣ муташаккилона идома дошта, иҷрои нақша дар вилоят давоми даҳ рӯз  27 фоизро ташкил медиҳад.

Аз рӯзи оғози даъвати баҳории шаҳрвандон ба хизмати ҳатмии ҳарбӣ иҷрои нақша давоми даҳ рӯзи ҷараёни ин маъракаи муҳими сиёсӣ дар шаҳру ноҳияҳои тобеи ҷумҳурӣ ба 47,3 фоиз баробар буда, аллакай шаҳру навоҳии Лахш, Нуробод, Рашт, Сангвор ва Тоҷикобод аз анҷоми он гузориш доданд.

Дар ҷараёни даҳ рӯзи чорабиниҳои даъватӣ дар комиссариатҳои ҳарбии чаҳор навоҳии пойтахт иҷрои нақша 42 фоизро ташкил медиҳад.

АКС: Вазорати мудофиаи ҶТ