МАРЗИ НОМУСАМ, ВАТАН! Ноҳияҳои минтақаи Рашт маъракаи даъвати ҳарбиро дар рӯзи аввал ба анҷом расониданд

Апрель 1, 2022 12:14

РАШТ, 01.04.2022 /АМИТ «Ховар»/. Субҳи имрӯз дар қисми ҳарбии қӯшунҳои зудамали  Вазорати мудофиаи Ҷумҳурии Тоҷикистон дар ноҳияи Рашт «Рӯзи даъватшаванда»  бо шукӯҳу шаҳомати хосса баргузор гардид. Ба  майдони қисми ҳарбӣ  даъватшавандагон аз ноҳияҳои минтақаи Рашт ба таври ихтиёрӣ барои шомил шудан ба сафи Артиши миллӣ ҳозир гардиданд, ки дар натиҷа ноҳияҳои Сангвору Лахш нақшаи даъвати ҳарбиро сад фоиз, Тоҷикобод 105 фоиз, Нуробод 101 фоиз ва Рашт 100,7 фоиз иҷро намуданд. 

Дар ҳамоиш  раисони ноҳияҳои минтақаи Рашт, намояндагони мақомоти ҳифзи ҳуқуқ, Вазорати мудофиаи Ҷумҳурии Тоҷикистон, падару модарони даъватшавандагон ва собиқадорону фаъолони ҷомеа иштирок намуда, бо ҳидоятҳои нек наваскаронро гусел намуданд.

Раиси ноҳияи Тоҷикобод Қадриддин Фақерзода ба хабарнигори АМИТ «Ховар» Субҳониддини Маҳмуд гуфт, ки «ба ҷо овардани хизмати ҳарбӣ, ки онро маҷозан хизмати Ватан – Модар меномем, қарзи муқаддаси ҳар ҷавони бонангу ори мамлакат аст. Чӣ хуб аст, ки солҳои охир ҳисси ватандӯстӣ ва худшиносии ҷавонони бошарафи водии Рашти бостонӣ боло рафта, ихтиёран ба сафи Қувваҳои Мусаллаҳи Ҷумҳурии Тоҷикистон мепайванданду рисолати шаҳрвандии хешро бо сари баланд адо менамоянд. Ҷавононе, ки хизмати ҳарбиро ихтиёр намудаанд, бо ҷасораташон қаҳрамонони рӯзҳои мо ба шумор рафта, на танҳо мояи ифтихори волидайн, деҳа ва ноҳияи хеш, балки шоистаи ифтихори Ватани маҳбубамон — Тоҷикистон мебошанд».

Дар ҳамоиши мазкур  ба 90  нафар наваскароне, ки курси ронандагии ҶДММ «Мададгори мудофиа» – ро хатм намуда, барои ба сафи Артиши миллӣ шомил шудан ихтиёран ариза навишта буданд, шаҳодатномаҳои ронандагӣ супорида шуд.

Хизматчиёни давлатии навоҳии минтақаи Рашт, аз ҷумла раиси ноҳияи Рашт Муқимҷон Набизода, раиси ноҳияи Тоҷикобод Қадриддин Фақирзода, мудири шуъбаи ташкилӣ ва кор бо кадрҳои дастгоҳи раиси ноҳияи Нуробод Назригул Шамсиева, мудири шуъбаи молияи ноҳияи Рашт Хурсанд Давлатёрзода ва дигарон бо масъулияти баланди ватандўстї, њамчун намунаи ибрат фарзандони худро ба сафи Артиши миллӣ гусел намуданд.

Сокини ноҳияи Рашт Оимнисо Таваккалова иброз дошт, ки “мо, занону бонувони Раштонзамин сиёсати хирадмандонаи Сарвари давлатро содиқона дастгирӣ намуда, фарзандонамонро дар рӯҳияи ватандӯстию меҳанпарастӣ тарбия менамоем. Хушбахтона, имрӯзҳо заҳмати шабонарӯзиамонро мебинем, ки чӣ гуна фарзандони мо масъулияти ватандориро ҳис намуда, бо сари баланд ба сафи Артиши миллӣ шомил мегарданд ва номи худу волидайну деҳаю ноҳияи хешро дар сатҳи ҷумҳурӣ муаррифӣ менамоянд”.

Раиси  ноҳияи Сангвор Маҳмадшоҳ Давлатзода гуфт, ки «волотарин меъёри ватандорию ватандӯстӣ расидан ба қадри Ватан, миллат ва давлати соҳибистиқлол, ба ҷо овардани хизмати Ватан ва ҳифзи марзу буми он аст, ки хушбахтона, ҷавонони ноҳияи Сангвор ҳамасола дар рӯзи даъвати ҷавонон ба Артиши миллӣ ихтиёрӣ ба комиссариати ҳарбии ноҳия ҳозир шуда, барои хизмат дар сафи Қувваҳои Мусаллаҳи Ҷумҳурии Тоҷикистон сафарбар карда мешаванд. Айни замон дар сафи Қувваҳои Мусаллаҳи Ҷумҳурии Тоҷикистон аз ноҳияи Сангвор зиёда аз 100 нафар ҷавонон содиқона хизмат намуда истодаанд. Ба даъвати баҳорӣ ҷавонони синни даъватӣ ба таври ихтиёрӣ ба сафи Қувваҳои Мусаллаҳи Ҷумҳурии Тоҷикистон ворид гардиданд».

Дар маъракаи мазкур даъватшаванда аз ноҳияи Лахш Сафарбеки Соимзода аз ҷавонони ҷумҳурӣ даъват ба амал овард, ки «ҳифзи ватану модару хоҳар номуси мардони шуҷою далеру боғайрат мебошад. Аз ин рӯ ҳамсолони ман аз саросари ҷумҳурӣ бояд аз хизмати ҳарбӣ наҳаросанд ва пайрави гузаштагони худ гардида, ҳамеша баҳри ҳимояи марзу буми Ватани аҷдодӣ омода бошанд».

Дар анҷоми ҷамъомади тантанавӣ дастаи ҳаваскорони бахшҳои фарҳанги ноҳияҳои минтақа барномаи ҷолиби консертиро манзури ҳозирин карданд.

АКСҲО: АМИТ «Ховар»

Апрель 1, 2022 12:14

Хабарҳои дигари ин бахш

Ҷавонон бояд қарзи шаҳрвандӣ — таҳсили илму дониш ва саҳмгузорӣ дар пешрафти Ватанро софдилона иҷро намоянд
Тоҷикистон дар мубориза бо қочоқ ва муомилоти ғайриқонунии маводи нашъаовар нақши калидӣ дорад
Ҳайати Тоҷикистон дар чорабиниҳои канорӣ дар доираи иҷлосияи 67-уми Комиссияи Созмони Милали Муттаҳид оид ба воситаҳои нашъадор иштирок намуд
Дар Вена ҳамкории Тоҷикистон бо Чин ва Эрон дар мубориза бо муомилоти ғайриқонунии маводи нашъадор баррасӣ шуд
Ҷаласаи гурӯҳҳои кории ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон баргузор гардид
Ҳайати Тоҷикистон дар чорабинии канории Қазоқистон дар Вена иштирок намуд
Дар Вена оид ба сиёсати зиддимухаддиротии Ҷумҳурии Тоҷикистон маълумот дода шуд
Мулоқоти ҳамраисони ҳайатҳои ҳукуматии Тоҷикистон ва Қирғизистон оид ба делимитатсия ва демаркатсияи сарҳади давлатӣ доир гардид
Тарбияи ватандӯстӣ — омили муттаҳидии миллат дар мубориза бар зидди ифротгароӣ ва хурофотпарастӣ
Ҳайати Тоҷикистон дар иҷлосияи 67-уми Комиссияи Созмони Милали Муттаҳид оид ба воситаҳои нашъадор дар Вена иштирок дорад
14 МАРТ-ИДИ КАСБИИ КОРМАНДОНИ ПРОКУРАТУРА. Давоми 32 сол фаъолияти ин ниҳоди давлатӣ ба таври назаррас тақвият ёфт
Эмомалӣ Раҳмон: «Хурофот хатарест, ки ба имрӯзу ояндаи Тоҷикистон ва минтақа таҳдиди ҷиддӣ дорад»