АҲСАН! Руҳафзо Ҳақназарова низ чун Шоира Зулқайнарова Чемпионати ҷаҳон оид ба боксро бо ғалаба оғоз намуд

Май 13, 2022 08:37

ДУШАНБЕ, 13.05.2022 /АМИТ «Ховар»/. Муштзанбонуи тоҷик Руҳафзо Ҳақназарова дар рӯзи 4-уми Чемпионати ҷаҳон оид ба намуди бокс бар муштзани боливӣ Айда Санталларо бо натиҷаи 5 бар 0 ғолиб омад, хабар медиҳад шореҳи варзиши АМИТ «Ховар» бо истинод ба Федератсияи бокси Тоҷикистон.

Муштзани тоҷик Руҳафзо Ҳақназарова дирӯз дар Чемпионати ҷаҳон оид ба намуди бокс, ки дар Туркия ҷараён дорад, дар вазни то 50 кг ба муқобили муштзани боливӣ Айда Сантала қуввасанҷӣ кард. Рақобати варзишгарон дар даври 1/32-ниҳоӣ оғоз шуда, 5 раунд идома кард. Дар ин рақобат муштзани мо аз ҳариф як сару гардан боло буд ва бо қарори доварон бо натиҷаи 5 бар 0 ғалаба ба даст овард. Ҳамин тавр, Руҳафзо Ҳақназарова ба марҳилаи 1/16- ниҳоӣ баромад.

Ёдовар мешавем, ки муштзанбонуи шинохтаи тоҷик Шоира Зулқайнарова дар рӯзи 3-юми Чемпионати ҷаҳон оид ба намуди бокс дар вазни то 63 кг ба муқобили муштзани кувайтӣ Алмутари Ноура рақобат кард. Сабқати муштзанон дар даври 1/32-ниҳоӣ оғоз шуда, 5 раунд идома карда, бо натиҷаи 5 бар 0 ба нафъи варзишгари мо Шоира Зулқайнарова анҷом ёфт. Ҳамин тавр, Шоира Зулқайнарова ба марҳилаи 1/16- ниҳоӣ баромад.

Мавриди зикр аст, ки Ҷумҳурии Тоҷикистонро дар ин мусобиқаи бонуфуз 4 варзишгар — Сумайя Қосимова (-48кг), Руҳафзо Ҳақназарова (-50кг), Миҷгона Самадова (-57кг) ва Шоира Зулқайнарова (-63кг) намояндагӣ доранд. Онҳоро дар ин мусобиқа сармураббӣ Мирзо Шамсиев роҳбарӣ менамояд.

Дар рӯзи якуми мусобиқа муштзанбонуи кишвари мо Сумая Қосимова дар вазни то 48 кг аз муштзани булғорӣ Севда Асенова дар марҳилаи 1/32-ниҳоӣ шикаст хӯрд. Ҳамчунин муштзани дигари кишвари мо- Миҷгона Самадова 11 май дар вазни то 57 кг ба муқобили муштзани тайванӣ Лин Ю –Тин вориди рақобат шуда, аз ҳарифаш мағлуб гардид.

Хотиррасон мешавем, ки мусобиқаи мазкур аз 6 то 21 май дар шаҳри Истанбули Туркия баргузор шуда, дар он 419 варзишгар аз 93 кишвари ҷаҳон ширкат меварзанд.

АКС аз манбаъҳои боз

Май 13, 2022 08:37

Хабарҳои дигари ин бахш

Сармураббии дастаи мунтахаби наврасони Тоҷикистон Зайниддин Раҳимов: «Чемпионати CAFA марҳилаи омодагӣ ба мусобиқаи интихобии Ҷоми Осиё-2023 аст»
Бахшида ба Рӯзи ҷавонон дар шаҳри Бохтар Дави миллӣ доир мегардад
Имрӯз дар Душанбе Чемпионати CAFA-2022 миёни дастаҳои наврасони то 16-сола оғоз мешавад
15 МАЙ-ДАВИ МИЛЛӢ. Бахшида ба Рӯзи ҷавонони Тоҷикистон дар Душанбе мусобиқаи варзишӣ баргузор мешавад
СУПЕРҶОМИ ТОҶИКИСТОН-2022 ОИД БА ФУТЗАЛ. Бозӣ миёни дастаҳои «Соро компания» ва «Сипар» 14 май дар Душанбе барпо мегардад
ЧЕМПИОНАТИ ТОҶИКИСТОН. Имрӯз «Хуҷанд» бо «Равшан» ва «Хатлон» бо «Истиқлол» рақобат мекунанд
БОКС. Шоира Зулқайнарова чемпионати ҷаҳонро бо ғалаба оғоз намуд
ФУТБОЛ. Пагоҳ дар Душанбе Чемпионати CAFA миёни наврасони то 16-сола оғоз мешавад
Ғолибони Мусобиқаи ҷумҳуриявии Ҷоми Федератсияи тенниси рӯи мизи Тоҷикистон муайян гардиданд
Тоҷикистонро дар Ҷоми Осиё-2022 оид ба дзюдо миёни наврасон ва ҷавонон 13 нафар варзишгарон намояндагӣ мекунанд
ФУТБОЛ. «Файзканд» ва КМВА дар даври шашуми Чемпионати Тоҷикистон миёни дастаҳои Лигаи олӣ ғолиб шуданд
ҶОМИ ОСИЁ-2023. Дастаи мунтахаби Тоҷикистон оид ба футбол пеш аз бозиҳои интихобӣ дар Дубай тамринҳои дастҷамъона баргузор мекунад