Дар Кӯлоб ба эҳтиёҷмандон қитъаи замин ҷудо мегардад

ДУШАНБЕ, 29.05.2022 /АМИТ «ХОВАР»/. Бо мақсади таъмини эҳтиёҷоти аҳолӣ дар асоси қарори Ҳукумати Ҷумҳурии Тоҷикистон майдони 32 гектар заминҳои кишоварзии шаҳри Кӯлоб ба фонди замини наздиҳавлигӣ гузаронида шуд, хабар медиҳад АМИТ «Ховар» бо истинод ба бахши матбуоти мақомоти иҷроияи ҳокимияти давлатии шаҳри Кӯлоб.

Дар марҳилаи аввал дар деҳаи Мирнишини ҷамоати деҳоти Даҳана ба 150 нафар эҳтиёҷмандон ба майдони 0,05 га замини наздиҳавлигӣ муайян гардидааст.

Бояд зикр намуд, ки заминҳои наздиҳавлигӣ дар асоси аризаҳои пешниҳодкардаи сокинон ба аҳолӣ тақсимбандӣ карда шуда, дар наздикатарин фурсат тақсимоти он дар деҳаи мазкур оғоз мегардад.

Дар баробари ҷудо гардидани қитъаҳои наздиҳавлигӣ инчунин бо дастгирии мақомоти иҷроияи ҳокимияти давлатии шаҳри Кӯлоб барои ҳалли мушкилоти иҷтимоии сокинон дар деҳаи Мирнишин корҳои ободониву созандагӣ ва азнавсозии роҳҳо бо маром идома доранд.

АКС: Бахши матбуоти МИҲД-и ш.Кӯлоб