МИНА ГУЛИ – ДАР ТОҶИКИСТОН: МАРАФОНИ ҶАҲОНӢ ИДОМА ДОРАД. Он баҳори соли оянда дар Ню-Йорк ба анҷом мерасад
ДУШАНБЕ, 20.05.2022 /АМИТ «Ховар»/. Имрӯз, соати 5-и субҳ ба вақти маҳаллӣ шаҳрванди Австралия Мина Гули аз меҳмонхонаи ноҳияи Фархор ба самти маркази ноҳияи Мир Сайид Алии Ҳамадонӣ дави сеюми худро оғоз намуд. Дар ин бора ба хабарнигори АМИТ «Ховар» намояндаи котиботи Конфронси дуюми байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018-2028» Дилором Шералиева иттилоъ дод.
Тавре гуфта мешавад, масофаи дави Мина 42,2 километрро ташкил медиҳад. Дави дуюми ӯ 18 май, соати 5-и субҳ аз даромадгоҳи ноҳияи Шаҳритӯс оғоз шуда, ба самти ҷануб ба сӯи Амударё то наздикии қаламрави Айвоҷ идома ёфт. Тибқи барномаи марафон, дар Тоҷикистон 10 марафони дав баргузор мешавад.
Мавриди зикр аст, ки дави Мина Гули дар Тоҷикистон 16 май дар самти «Панҷакент — Айнӣ – Душанбе» ба масофаи 42 километр оғоз шуд.
Дар бораи марафони ҷаҳонӣ
Ёдовар мешавем, ки бахшида ба Даҳсолаи байналмилалии амал «Об барои рушди устувор, солҳои 2018-2028» ва Конфронси СММ оид ба об-2023 Мина Гулии австралиягӣ, ки ҳомии муҳити зист ва президенти Фонди «Thirst» (Ташнагӣ) оид ба ҳифзи захираҳои об мебошад, тасмим гирифт саёҳати ҷаҳонӣ анҷом дода, дар якчанд кишварҳои ҷаҳон марафони дав ташкил намояд. 16 май дар доираи марафони ҷаҳонӣ ӯ ба Тоҷикистон омад.
Марафони дав дар Тоҷикистон то 10 июн идома меёбад. Дар ин муддат Мина Гули нақша дорад, ки 10 марафонро дар масофаи 458,2 километр тай карда, аз манбаъҳои ғании оби Тоҷикистон, аз ҷумла кӯли Сарез, пиряхи Федченко, неругоҳҳои барқи обии «Роғун»-у «Норак» ва дигар мавзеъҳои сайёҳӣ дидан намояд.
Ӯ ҳамчунин нақша дорад, ки дар Конфронси дуюми байналмилалии сатҳи баланд бахшида ба Даҳсолаи байналмилалии амал «Об барои рушди устувор, солҳои 2018-2028», ки 6-8 июни соли ҷорӣ дар шаҳри Душанбе баргузор мешавад, ширкат варзад.
Мина Гули кист?
Гули Эмма Серафина Линдсейи 51-сола (Guli Mina), ки бештар бо номи Мина Гули маъруф аст, соҳибкори австралиягӣ дар соҳаи муҳити зист аст. Ӯ президенти Фонди «Thirst» (Ташнагӣ) оид ба захриаҳои об дар Ҳонконг мебошад.
Мина дар наздикии шаҳри Мелбурни Австралия таваллуд шудааст ва дар донишгоҳи маҳаллӣ таҳсил кардааст. Соли 1993 ӯ президенти Иттифоқи донишҷӯёни Донишгоҳи Монаш интихоб шуд.
Дар синни 22 ба сари Мина ҳодисаи нохуш омад: ӯ дар пайи ҳодисае дар ҳавз пушташро захмӣ кард ва табибон ба ӯ гуфтанд, ки дигар ҳеҷ гоҳ давида наметавонад. Аммо ӯ шикаст нахӯрда, машқро идома дод.
Мина баъди хатми донишгоҳ ба ҳайси ҳуқуқшинос дар бахши энергетика ва инфрасохтор кор кардааст. Соли 1999 дар биржаи фючерсии Сидней дар рушди бозорҳои карбон дар Австралия иштирок намуд.
Соли 2002 ӯро Бонки ҷаҳонӣ барои кумак дар таҳияи лоиҳаҳои тиҷорати карбон дар Чин, Ҳиндустон, Непал ва Индонезия ба кор даъват кард.
Ӯ собиқ муовини раиси Палатаи савдои Австралия дар Чин аст. Соли 2005 ба кори ҷамъиятии худ баргашт ва фаъолиятро дар масъалаҳои энергияи барқароршаванда ва тағйирёбии иқлим идома дод.
Гули мушовири стратегии Ҳамкории муштараки ИМА ва Чин оид ба энергияи тоза ва узви Шӯрои ҷаҳонии рӯзномаи Форуми умумиҷаҳонии иқтисодӣ оид ба истеъмоли устувор мебошад. Соли 2010 дар Форуми умумиҷаҳонии иқтисодӣ ҳамчун роҳбари ҷавони ҷаҳонӣ интихоб шуд.
Лайло ТОИРӢ,
Акрамхоҷа АКБАР,
АМИТ «Ховар»
АКС: АМИТ «Ховар»/котиботи Конфронси дуюми сатҳи байналмилалӣ оид ба Даҳсолаи байналмилалии амал «Об барои рушди устувор, солҳои 2018-2028»
Пиряхҳои Тоҷикистон боигарии бебаҳои табиӣ ва сарчашмаҳои муҳими оби тоза дар Осиёи Марказӣ мебошанд
ҶОИЗАИ «ШАҲРИ СУЛҲ». Онро Душанбе барои саҳми беандоза дар таҳкими сулҳ ва арзишҳои башарӣ бо қарори ЮНЕСКО соҳиб гардид
МАСЪУЛИЯТИ ШАҲРВАНДӢ. Барои ғайриқонунӣ истифода бурдани неруи барқ ҷавобгарии ҷиноятӣ муқаррар гардид
Президенти Комиссияи Иттиҳоди Аврупо Урсула фон дер Ляйен аз иқтидори бузурги Неругоҳи азими барқи обии «Роғун»-и Тоҷикистон ёдовар шуд
Президенти Тоҷикистон тавсеаи ҳамкории давлатҳои Осиёи Марказиро бо Иттиҳоди Аврупо дар соҳаи энергетикаи «сабз» аз самтҳои ояндадор номиданд
Эмомалӣ Раҳмон: «Пиряхҳои Тоҷикистон танҳо манбаи об барои минтақа набуда, дар нигоҳдории иқлими минтақа низ нақши муҳим мебозанд»
Инъикоси густурдаи таҷлили Ҷашни байналмилалии Наврӯз бо иштироки Сарони се давлати Осиёи Марказӣ дар расонаҳои хабарии минтақаю ҷаҳон ва шабакаҳои иҷтимоӣ
Эмомалӣ Раҳмон: «Натиҷаҳои вохӯриҳои имрӯзаро мо ҳамчун пайки таҷдид ва оғози марҳилаи сифатан нав дар муносибатҳои се кишвар медонем»
Президенти Тоҷикистон: «Худдорӣ намудан аз ҳама гуна зиёдаравию исрофкорӣ вазифаи ҳар бандаи муъмин дар ҳама ҳолат, аз ҷумла дар айёми ид мебошад»
23 март-Рӯзи ҷаҳонии обуҳавошиносӣ. Дар ҳар се соат ҳавошиносони тоҷик ба Хадамоти ҷаҳонии ҳавошиносӣ маълумот пешниҳод менамоянд
«НАВРӮЗ ДАР АСЛ ҶАШНИ ЗИНДАГИСОЗ АСТ». Иқтибос аз суханрониҳои Президенти Ҷумҳурии Тоҷикистон
