«МО БА САҲМ ВА ФИДОКОРИҲОИ БЕШ АЗ 250 000 ТОҶИКОН ДАР ҶАНГИ ДУЮМИ ҶАҲОНӢ ЭҲТИРОМ МЕГУЗОРЕМ». Сафорати ИМА дар Душанбе мардуми Тоҷикистонро ба шарафи Рӯзи Ғалаба табрик кард

ДУШАНБЕ, 07.05.2022 /АМИТ «Ховар»/. Сафорати ИМА дар Душанбе мардуми Тоҷикистонро ба муносибати солгарди 77-уми пирӯзии неруҳои муттафиқин бар фашизм дар Ҷанги дуюми ҷаҳонӣ табрик кард. Дар ин бора АМИТ «Ховар» бо истинод ба Сафорати ИМА дар Душанбе хабар медиҳад.

«Мо ба саҳм ва фидокории беш аз 250 000 тоҷикон, ки миёни 34 миллион нафар сарбозони Артиши Сурх дар иттиҳод бо Иёлоти Муттаҳида, Британия, Лаҳистон, Фаронса ва дигар иттифоқчиён хизмат кардаанд, эҳтиром мегузорем», — омадааст дар табрикоти сафорат.

Гуфта мешавад, ки  кормандони Сафорати ИМА ин рӯзро бо ёдоварӣ аз  ниёгони мо, ки дар ин ҷанг корнамоӣ нишон додаанд, ҷашн хоҳанд гирифт.

«Якҷоя неруҳои мо паҳлӯи ҳам мубориза бурданд, то итминон ҳосил кунанд, ки даҳшати Ҷанги дуюми ҷаҳонӣ ҳаргиз такрор нахоҳад шуд», — зикр шудааст дар табрикот.

АКС аз бойгонӣ