Раиси Маҷлиси миллии Маҷлиси Олии Тоҷикистон Рустами Эмомалӣ бо Раиси Кумитаи доимии Маҷлиси умумичинии намояндагони халқи Чин Ли Чжаншу дар шакли маҷозӣ мулоқот намуданд

Май 17, 2022 17:56

ДУШАНБЕ, 17.05.2022 /АМИТ «Ховар»/. 17 май Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ бо узви доимии Бюрои сиёсии Кумитаи Марказии Ҳизби коммунисти Чин, Раиси Кумитаи доимии Маҷлиси умумичинии намояндагони халқи Ҷумҳурии Мардумии Чин Ли Чжаншу дар шакли маҷозӣ мулоқот намуданд. Дар ин бора ба АМИТ «Ховар» дар Маҷлиси миллии Маҷлиси Олии Ҷумҳурии Тоҷикистон хабар доданд.

Дар мулоқот, ки бо хоҳиши ҷониби Чин баргузор гардид, вазъ ва дурнамои рушди ҳамкории дуҷониба, таҳкими робитаҳои байнипарламентӣ, инчунин масъалаҳои муҳими минтақавӣ ва байналмилалӣ мавриди баррасӣ қарор дода шуд.

Бо таваҷҷуҳ ба 30-солагии барқароршавии муносибатҳои дипломатии байнидавлатӣ муҳтарам Рустами Эмомалӣ мулоқоти имрӯзаро ҷузъи муҳими чорабиниҳо бахшида ба ин рӯйдоди таърихӣ арзёбӣ намуданд.
Таъкид гардид, ки рушди робитаҳои гуногунҷанба бо Чин дар заминаи таваҷҷуҳи хосаи сарони давлатҳо ва пояи боэътимоди ҳуқуқӣ, дӯстӣ, ҳамсоягии нек ва ҳамкорӣ аз самтҳои асосии сиёсати хориҷии Ҷумҳурии Тоҷикистон ба ҳисоб меравад.

Ҳамкории байнипарламентӣ ҳамчун ҷузъи ҷудонопазири муносибатҳои Тоҷикистону Чин буда, парламентҳои кишварҳо дар пешбурди маҷмӯи масъалаҳои ҳамкории дуҷониба нақши муҳим доранд.

Ҷонибҳо аз тавсеаи робитаҳои байнипарламентӣ дар сатҳи дуҷониба ва дар доираи ташкилотҳои байналмилалӣ, инчунин равобити зичи роҳбарияти парламенти Тоҷикистон бо Маҷлиси умумичинии намояндагони халқи Чин изҳори қаноатмандӣ намуданд.

Дар мулоқот ҳамчунин масоили рушди ҳамкорӣ дар соҳаҳои тиҷорату иқтисод, сармоягузорӣ ва иҷтимоӣ муҳокима карда шуд.

Таъкид гардид, ки Тоҷикистон дар доираи ташаббуси «Як камарбанд — як роҳ» ба тавсеаи бештари ҳамкорӣ, хусусан дар самти ҷалби сармоя ба соҳаҳои иқтисоди миллӣ ҳавасманд мебошад.


Густариши ҳамкорӣ дар соҳаҳои фарҳангу иҷтимоиёт, маориф, тандурустӣ, инчунин ҳамкории босамари байни минтақаҳои ду давлат аз самтҳои афзалиятноки муносибатҳои шарикии дуҷониба маънидод гардид.

Ба ҷониби Чин барои расонидани кумаки моддӣ дар шакли ваксинаҳои зидди короновирус дар давраи паҳншавии ин бемории сироятӣ изҳори сипос карда шуд.

Зимни мулоқот таваҷҷуҳи ҷониби Чин асосан ба густариши робитаҳои байнипарламентӣ, рушди ҳамкорӣ дар самти сохтмону таҷдиди иншооти энергетикӣ ва таҳкими заминаҳои истеҳсоли «технологияи сабз», бахусус мошинҳои электрикӣ ва панелҳои офтобӣ, идомаи ҳамкорӣ дар бахшҳои нақлиёт, логистика, рақамикунонии соҳаи нақлиёту коммуникатсия, ҳарчи зудтар барқарор кардани алоқаи ҳавоӣ байни давлатҳо, роҳандозӣ кардани имтиёзҳои гумрукӣ барои интиқоли молҳои ниёзи мардум, афзоиш додани содироти маҳсулоти тозаи кишоварзӣ ва ғайра ҷалб карда шуд.

Ҷонибҳо зимни баррасии мавзӯи амниятӣ ба масъалаҳои мубориза бар зидди терроризм, экстремизм, ҷудоихоҳӣ, ҷиноятҳои муташаккили фаромиллӣ, гардиши ғайриқонунии маводи нашъаовар ва ҷиноятҳои киберӣ, инчунин таъмини амнияту субот дар шароити авзои мураккаби аксар давлатҳои минтақа ва ҷаҳон таваҷҷуҳ зоҳир карданд.

Инчунин ба рушди робитаҳо дар доираи Созмони ҳамкории Шанхай ва дигар созмонҳои байналмилалию митақавӣ аҳамияти хос дода шуд.

Дар охири мулоқот Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ аз Раиси Кумитаи доимии Маҷлиси умумичинии намояндагони халқи Ли Чжаншу даъват ба амал оварданд, ки бо сафари расмӣ ба Тоҷикистон ташриф оранд.

Дар навбати худ, Раиси Кумитаи доимии Маҷлиси умумичинии намояндагони халқи Чин Ли Чжаншу Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалиро ҷиҳати анҷом додани сафари расмӣ дар фурсати барояшон муносиб ба Чин даъват намуд.

Даъват аз ҳар ду ҷониб бо хушнудӣ пазируфта шуд.

АКС: Тоҳир САИД/АМИТ «Ховар»

Май 17, 2022 17:56

Хабарҳои дигари ин бахш

Муовини Раиси Маҷлиси намояндагон бо ҳайати Шоҳигарии Белгия мулоқот намуд
Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ дар шаҳри Сочӣ аз маҷмааи таълимии «Сириус» дидан намуданд
Раиси Маҷлиси намояндагон бо роҳбарони ҳайатҳои Форуми «Муколамаи занони Осиёи Марказӣ» мулоқот намуд
Рустами Эмомалӣ бо Раиси Думаи давлатии Маҷлиси Федералии Федератсияи Русия Вячеслав Володин мулоқот намуданд
Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ бо Президенти Федератсияи Русия Владимир Путин мулоқот намуданд
Рустами Эмомалӣ бо Раиси Шурои Федератсияи Маҷлиси Федералии Федератсияи Русия Валентина Матвиенко мулоқот намуданд
Рустами Эмомалӣ дар назди оромгоҳи Сарбози номаълум дар боғи Александри шаҳри Москва гулчанбар гузоштанд
Рустами Эмомалӣ барои анҷом додани сафари расмӣ вориди шаҳри Москва гардиданд
Дар Маҷлиси намояндагон Қонуни Ҷумҳурии Тоҷикистон «Дар бораи маърифати экологии аҳолӣ» баррасӣ гардид
Рустами Эмомалӣ ба шаҳри Москваи Федератсияи Русия сафар намуданд
Дар Душанбе рушди муносибатҳои байнипарламентии Тоҷикистон ва Ҷопон баррасӣ гардид
Дар Душанбе густариши ҳамкории байнипарламентии Тоҷикистон ва Туркия баррасӣ гардид