Sputnik: Тоҷикистон ва Узбекистон ният доранд гардиши молро ба 1 миллиард доллар расонанд

ДУШАНБЕ, 16.05.2022 /АМИТ «Ховар»/. Вазирони корҳои хориҷии Тоҷикистон ва Узбекистон зимни суханронӣ дар бораи шарикии  тиҷоратию иқтисодӣ зарурати иҷрои дастурҳои президентони  ду кишвар- Эмомалӣ Раҳмон ва Шавкат Мирзиёевро дар бораи солҳои наздик расонидани ҳаҷми муомилоти мол ба 1 миллиард доллар таъкид намуданд. Тавре агентии русии Sputnik бо истинод ба дафтари матбуоти Вазорати корҳои хориҷии Узбекистон иттилоъ медиҳад, дар ин бора 13 май зимни мулоқоти Вазири корҳои хориҷии Тоҷикистон Сироҷиддин Муҳриддин ва иҷрокунандаи вазифаи вазири корҳои хориҷии Узбекистон Владимир Норов дар чаҳорчӯби ҷаласаи Шӯрои вазирони корҳои хориҷии ИДМ дар Душанбе сухан гуфта шуд.

Ҷонибҳо ҳамкории давлатҳоро дар бахшҳои сиёсат, нақлиёт, фарҳанг ва ҳамчунин иқтисоду тиҷорат баррасӣ карданд.

Илова бар ин, Узбекистон ва Тоҷикистон тасмим гирифтаанд ҳамкориро дар бахшҳои фарҳангиву гуманитарӣ густариш диҳанд — сухан инчунин дар бораи чорабиниҳои муштараки ду кишвар дар чаҳорчӯби 30-юмин солгарди истиқрори муносибатҳои дипломатӣ меравад.

Дар мавриди ҳамкории сиёсӣ ҷониби Тоҷикистон ба раёсати Узбекистон дар Созмони ҳамкории Шанхай (СҲШ) баҳои баланд дод. Тоҷикистон иштироки худро дар нишасти қарибулвуқӯи СҲШ дар Самарқанд тасдиқ намуд, хабар додааст дафтари матбуоти Вазорати корҳои хориҷии Узбекистон.

Ёдовар мешавем, ки нишасти сарони кишварҳои узви СҲШ 15-16 сентябр дар Самарқанд баргузор мешавад. Иштироккунандагони нишаст бояд 35 ҳуҷҷатро баррасӣ намоянд. Тавре моҳи марти имсол маълум гардид, 7-тои онҳо аллакай дар сатҳи коршиносон ба мувофиқа расидаанд.

АКС: NovaPress