Дар Кӯлоб даври вилоятии Фестивали ҷумҳуриявии «Сад ранги чакан» ҷамъбаст гардид

Июнь 13, 2022 14:09

ДУШАНБЕ, 13.06.2022. /АМИТ «Ховар»/. 11 июн дар назди Қасри фарҳанги ба номи Рустам Абдураҳими шаҳри Кӯлоб ҷамъомади идона бахшида ба ташрифи «Корвони Модарони ваҳдатсаро» ва ҷамъбасти даври вилоятии Фестивали ҷумҳуриявии «Сад ранги чакан» баргузор гардид, хабар доданд ба АМИТ «Ховар» дар Мақомоти иҷроияи ҳокимияти давлатии вилояти Хатлон

Меҳмонон нахуст аз намоиши ҳунарҳои мардумӣ, аз қабили гудӯзию чакандӯзӣ, заргарӣ, наққошӣ ва дигар маҳсули дастии ҳунармандони шаҳру деҳот ва ташкилоту муассисаҳои касбӣ – техникии шаҳри Кӯлоб дидан намуданд. Дар намоишгоҳ намунаҳои сершумори ин санъати бостонии тоҷикон, аз ҷумла дӯхти либосҳои гуногуни мардумии чакан, ҳамчунин лавозимоти рӯзгор- сӯзанӣ, болишт, зардеворӣ, гаҳворапӯш ба тамошо гузошта шуданд.

Сипас дар толори Қасри фарҳанг барномаи идона оғоз гардид, ки нахуст Раиси шаҳри Кӯлоб Бахтиёр Назарзода меҳмононро хайрамақдам гуфт.

— Чакан навъе аз ҳунарҳои мардумии дорои таърихи ниҳоят куҳан буда, баргузор намудани Фестивали «Сад ранги чакан» муҳаббати мардумро нисбат ба либосҳои миллӣ зиёдтар менамояд. Чакан, пеш аз ҳама, рамзи баҳор буда, гулдухтарони тоҷик онро дар ҷашнҳои Наврӯзу Меҳргон, чорабиниҳои фарҳангии давлатӣ, истиқболи меҳмонони олиқадр, тӯю маъракаҳои хонаводагӣ ба бар менамоянд, — гуфт Бахтиёр Назарзода.

Муовини Раиси вилояти Хатлон Фирӯза Шарифӣ зикр намуд, ки «Баргузории Фестивали «Сад ранги чакан» яке аз тадбирҳои асили гиромидошти арзишҳои фарҳангӣ буда, ҳадафи он баланд бардоштани эҳсоси ватандӯстиву хештаншиносӣ, ифтихори ватандорӣ, арҷ гузоштан ба таъриху тамаддун, фарҳангу адабиёт, расму оинҳои миллию мардумии халқи тоҷик мебошад. Дар доираи онҳо тарроҳону ҳунармандон, чакандӯзону наққошон ва аҳли илму фарҳанг маҳсули эҷоди хешро ба тамошо мегузоранд ва ба ин васила ба ҳунари бонувон арҷ гузошта мешавад».


— Бо ташаббусҳои созандаи Пешвои миллат муҳтарам Эмомалӣ Раҳмон санъати чакандӯзӣ бо тамоми назокаташ бори дигар эҳё гардида, дар ҷаҳон шуҳрат пайдо намудааст. Чакан гулдӯзии одӣ набуда, пайдоиши он ба ҳазораи дуюми пеш аз милод рост меояд. Оид ба кашидадӯзӣ дар китобҳои “Авасто”, “Шоҳнома” ва осори бисёре аз адибони гузашта маълумот дарёфт кардан мумкин аст. Ҳар нақшу нигори болои чакан ба худ маъние дорад ва розҳои модарони тоҷикро дар худ инъикос месозад, — афзуд Фирӯза Шарифӣ.

Фирӯза Шарифӣ инчунин доир ба рӯзи Ваҳдати миллӣ ва саҳми Пешвои миллат барои расидан ба сулҳи деринтизори халқи тоҷик ибрози андеша намуд.

Раиси Кумитаи кор бо занон ва оилаи назди Ҳукумати Ҷумҳурии Тоҷикистон Ҳилолбӣ Қурбонзода ва дигар занони фаъолу собиқадори меҳнат низ ҳозиринро ба ин рӯзи фархунда табрик гуфта, дар бораи сулҳу субот, ҳадафи баргузории чунин чорабиниҳои фарҳангӣ ва сиёсати фарҳангпарваронаю инсондӯстонаи Пешвои миллат ибрози ақида намуданд.

— Дар ҷаласаи 13-уми Кумитаи байниҳукуматӣ оид ба ҳифзи мероси фарҳанги ғайримоддии ЮНЕСКО дар шаҳри Порт-Луиси Ҷумҳурии Маврикий чакан ва ҳунари гулдӯзии точикон бо пешниҳоди Ҷумҳурии Тоҷикистон аз ҷониби ин Созмон ба Рӯйхати мероси фарҳанги ғайримоддии башарият расман ворид гардид, ки ин рӯйдод, албатта, муҷиби ифтихори мардуми сарбаланду фарҳангсолори тоҷик мебошад, — илова кард Ҳилолбӣ Қурбонзода

Дар қисмати дуюми чорабинӣ гулдастаи савту суруд аз тарафи санъаткорони бахши фарҳанги шаҳри Кӯлоб ва сарояндагони машҳури ҷумҳурӣ ба пешниҳоди иштирокдорон гардид.

Дар анҷоми чорабинӣ аз тарафи Мақомоти иҷроияи ҳокимияти давлатии вилояти Хатлон ва мақомоти иҷроияи ҳокимияти давлатии шаҳри Кӯлоб занони фаъоли минтақаҳои Тоҷикистон ва ғолибони даври вилоятии Фестивали ҷумҳуриявии «Сад ранги чакан» бо туҳфаҳои хотиравӣ ва “Ифтихорнома”, «Cипосномаҳо” қадрдонӣ карда шуданд.

Ёдовар мешавем, ки моҳи ноябри соли 2018 дар ҷаласаи 13 –уми Кумитаи байнидавлатии ЮНЕСКО оид ба ҳифзи мероси фарҳанги ғайримоддӣ, ки дар Ҷумҳурии Маврикий баргузор шуд, номинаи «Санъати гулдӯзии чакан дар Ҷумҳурии Тоҷикистон» расман дар феҳристи репрезентативии мероси фарҳанги ғайримоддии ЮНЕСКО сабт гардид. Дар ҷаласаи мазкур беш аз 800 нафар намоянда аз 120 давлати дунё иштирок доштанд, ки аксарияти онҳо номинаи пешниҳодшударо ҷонибдорӣ намуданд.

«Чакан як навъи гулдӯзии миллӣ дар матоъҳои пахтагӣ ва абрешимӣ аст, ки бештар дар байни занону духтарони тоҷик ривоҷ ёфтааст. Дар вилояти Хатлони Тоҷикистон чакан як ҷузъи муҳими либоси арӯсу домод ба шумор меравад. Дар инҷо домодҳо тоқии худро бо гулдӯзиҳои чакан оро медиҳанд ва занону духтарон дар рӯзҳои тӯй ва иду маросим куртаву поҷомаи чакан ба тан мекунанд. Санъати чакан аз насл ба насл бо шеваи устод-шогирд ба мерос мондааст», — чунин муаррифӣ карда шудааст чакан дар сомонаи ЮНЕСКО.

АКС: Мақомоти иҷроияи ҳокимияти давлатии шаҳри Кӯлоб

Июнь 13, 2022 14:09

Хабарҳои дигари ин бахш

27-СОЛАГИИ ВАҲДАТИ МИЛЛӢ. Ба ин муносибат дар Осорхонаи миллӣ гӯшаи доимоамалкунанда ташкил гардидааст
Афсарону сарбозони Гвардияи миллӣ бахшида ба Рӯзи Ваҳдати миллӣ ба тамошои Осорхонаи миллӣ омаданд
«СИ ҶИНПИН ДАР БОРАИ ИДОРАКУНИИ ДАВЛАТӢ». Маҳфили китобдӯстони Тоҷикистону Чин дар Душанбе ба ин мавзуъ бахшида шуд
ТОҶИКИСТОНУ ЧИН – ШАРИКОНИ СТРАТЕГӢ. Дар Академияи миллии илмҳои Тоҷикистон дар ин мавзуъ конференсияи байналмилалӣ баргузор шуд
«ТОҶИКОНА МЕПӮШЕМ!». Бонувони Китобхонаи миллии Тоҷикистон либоси миллиро тарғиб менамоянд
Маҷаллаи «ал-Баён»-и Робитаи адибони Кувайт ашъори шоираи ҷавони тоҷик Сурайё Ҳакимоваро нашр намуд
Мутахассисони соҳаи синамои тоҷик дар Донишкадаи давлатии умумирусиягӣ ба таҳсил фаро гирифта мешаванд
ЧАКАН ДАР ПАРИЖ. Тарроҳи тоҷик рангорангӣ, ғановат ва гуногунии онро дар Ҳафтаи мӯд намоиш медиҳад
Дар Хуҷанд бо иштироки ҳайати занони Чин барномаи фарҳангӣ доир гардид
ҲАФРИЁТИ БОСТОНШИНОСӢ. Аз ёдгории Ҳалқаҷар зевари тиллоӣ кашф гардид
ҚАЛЪАИ ЯМЧУН — ҚАДИМТАРИН ДАР ОСИЁИ МАРКАЗӢ. Ин ёдгории фарҳангӣ дар ҳаҷми 4,2 миллион доллари амрикоӣ навсозӣ мегардад
Китобхонаи миллии Тоҷикистон беш аз 100 асари Пешвои миллатро дар шакли электронӣ мавриди истифодаи умум қарор дод