Сармураббии тими миллии Тоҷикистон Петр Сегрт: «Ҳадафи мо баромадан ба марҳилаи ниҳоии Ҷоми Осиё-2023 аст»

ДУШАНБЕ, 08.06.2022 /АМИТ «Ховар»/. 7 июн дар остонаи оғози марҳилаи интихобии Ҷоми Осиё-2023 дар гурӯҳи «F» нишасти хабарӣ баргузор шуд, ки дар он сармураббии тими миллии Тоҷикистон оид ба футбол Петр Сегрт ва капитани даста Аҳтам Назаров ширкат намуданд. Дар ин бора ба АМИТ «Ховар» дар Федератсияи футболи Тоҷикистон хабар доданд.

«Дар гурӯҳи мо дастаи заиф нест, ҳама барои ғалаба мубориза мебарад. Дастаҳо дар сатҳи наздиканд, мо ҳар як рақибро эҳтиром мекунем ва мубориза хоҳем бурд. Рақибони худро хуб омӯхтем ва ҳоло тамоми диққатамонро ба бозии аввал бо яккачини Мянмар равона кардаем. Ман аз ҳайати худ ва интихоби бозигарон қаноатмандам. Пеш аз оғози марҳилаи интихобӣ мо дар Дубай ҷамъомади таълимӣ-тамринӣ доштем, ки дар он даста ба таври ҷиддӣ кор кард. Мехоҳам бигӯям, ки давоми ду ҳафта омода кардани як даста душвор аст, аммо мо умедворем, ки ба қисми ниҳоии Ҷоми Осиё роҳхат мегирем. Маҳз ҳамин мақсад назди даста гузошта шудааст»,- зикр намуд Петр Сегрт, сармураббии тими миллии Тоҷикистон.

Ба гуфти капитани тими миллии Тоҷикистон Аҳтам Назаров, «дастаи мо омодааст, ки дар бозиҳои интихобии Ҷоми Осиё барои ба даст овардани роҳхат тамоми ҳастии худро сарф созад. Кӯшиш мекунем, ки натиҷаи қаноатбахш ба даст орем».

Имрӯз, 8 июн дар шаҳри Бишкек марҳилаи интихобии Ҷоми Осиё-2023 дар гурӯҳи «F» оғоз мешавад. Мунтахабҳои Тоҷикистон, Қирғизистон, Сингапур ва Мянмар барои баромадан ба марҳилаи ниҳоии мусобиқа миёни ҳам мубориза мебаранд.

Акс: ФФТ