Ҳушдори Кумитаи ҳолатҳои фавқулодда: «Дар рӯзҳои чангу ғубор аз ниқоб истифода намоед»

ДУШАНБЕ, 05.07.2022 /АМИТ «Ховар»/. Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон ба таваҷҷуҳи сокинони мамлакат мерасонад, ки ин номусоидии вазъи ҳаво ва чангу ғубор дар ноҳияҳои алоҳидаи ҷумҳурӣ то 7 июли соли равон боқӣ мемонад.

Дар ин рӯзҳо дар шаҳру ноҳияҳои тобеи марказ ва шаҳри Душанбе ҳаво аз 16 то 38 ва 41 дараҷа гарм мешавад. Инчунин дар ин рӯзҳо шамол аз самти шарқ бо суръати 5-10 метр дар як сония вазида, чангу ғубор боқӣ мемонад.

Ҳаво дар водиҳои вилояти Хатлон шабона 21+26 дараҷа гарм, рӯзона 36+41 дараҷа гарм, дар доманакӯҳо шабона 16+21 дараҷа гарм ва  рӯзона 30+35 дараҷа гарм мешавад.

Дар вилояти Суғд шамол аз самти шарқ бо суръати 4-9,  дар ноҳияҳои алоҳида бо шиддатнокии то 12-17 метр дар як сония мевазад. Дар баъзе ноҳияҳо чангу ғубор боқӣ мемонад. Ҳаво аз 16 то 38 дараҷа гарм  мешавад.

Дар баъзе аз ноҳияҳои ВМКБ ин рӯзҳо чангу ғубор боқӣ монда, ҳаво аз дар ғарби вилоят шабона 14+19 дарҷа гарм, рӯзона 30+35 дараҷа гарм ва дар шарқи вилоят шабона 3+8 дарҷа гарм ва  рӯзона 19+24 дараҷа гарм мешавад.

Бояд гуфт, дар асоси омӯзишҳои илмии экологӣ ва тандурӯстӣ дар чунин рӯзҳои олуда бояд шаҳрвандони Тоҷикистон ҳаддалимкон аз ниқобҳо истифода намоянд, зеро ҳавои мазкур барои одамони синни 60 сола таъсири манфӣ дорад. Дар ин гуна вазъи ҳаво нафароне, ки гирифтори бемориҳои роҳҳои нафас, диққи нафас ва гирифтори ҳассосият ҳастанд, хуб мешуд барои ҳифзи саломатии худ аз ниқоб истифода баранд. Ин гуна ҳолати ба амаломада метавонад боиси хуруҷи микробҳо ва авҷ гирифтани бемориҳо гардад.

Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон дар ҳамин иртибот тавсия медиҳад, ки  ронандагон ва дӯстдорони сайёҳиву гардишгарон бояд дар ин гуна рӯзҳои пурчанг суръати ҳаракат дар роҳҳоро, техникаи бехатарии ҳаракат дар роҳҳои кӯҳиву наздикӯҳҳӣ, саҳроҳои доманфарохро риоя намоянд. Риояи фосила байни мошинҳо хеле муҳим аст, чун эҳтимоли резиши санг аз кӯҳҳо низ зиёд аст.

Чанд тавсия ба аҳолӣ барои пешгирӣ аз ҳодисаҳои нохӯш дар чунин ҳолатҳо:

— Бештари оби тоза нӯшед, ҳатто рӯзе на камтар аз 2-2,5 литр ва аз ин агар 0,5 литр оби минералӣ бошад, боз беҳтар аст,

— То ҳадди имкон тирезаҳои хонаатонро пӯшед. Агар шумо мехоҳед ҳавои хонаро тоза кунед, пас бидонед, ки бадтарин лаҳзаҳо соатҳои аввали субҳанд, вақте ҳамаи модаҳои муаллақи хатарнок ба нишаст ба замин мутамарказ мешавад.  Наздик ба нисфирӯзӣ қисмати болоии замин гарм мешавад ва зери таъсири ҳавои гарм ин модаҳои муаллақ боло мераванд. Ғайр аз ин,  шумо метавонед тирезаҳои худро бо докка ва ё тур бипӯшед ва хатари вуруди ҳар гуна модаи хатарнок кам мешавад. Аммо ҳамвора онҳоро бояд намнок нигоҳ доред,

— Ҳамешаву пайваста ҳавои дохили хонаро поку тоза нигоҳ доред, бо латтаи нарму нам тоза кардани фарш ва тирезаҳоро фаромӯш накунед,

— Духтурон дар ин гуна рӯзҳо пӯшидани ҳар гуна айнакҳои иртиботиро иҷозат намедиҳанд,

— Ба онҳое, ки гирифтори бемориҳои диққи нафас ва роҳи нафасанд тавсия дода мешавад:  дозаи доруҳои истеъмолиро дар ин рӯзҳо коҳиш надиҳед, ҳамеша бо худ ингляторҳо дошта бошем, агар талабот ба ингляторҳо аз 4-6 маротиба дар як рӯз зиёд шавад, ҳатман ба духтур муроҷиат намоед.

АКС аз бойгонии АМИТ «Ховар»