АНҶОМИ БОЗИҲОИ ҲАМБАСТАГИИ ИСЛОМӢ. Варзишгарони тоҷик сазовори 3 медали нуқра ва 5 биринҷӣ гардиданд

Август 19, 2022 14:28

ДУШАНБЕ, 19.08.2022 /АМИТ «Ховар»/. Шоми 18 август Бозиҳои 5-уми ҳамбастагии исломӣ дар шаҳри Қунияи Туркия бо баргузории маросими тантанавӣ ба анҷом расиданд, хабар медиҳад шореҳи варзиши АМИТ «Ховар» бо истинод ба Кумитаи миллии олимпии Тоҷикистон.

Дар Бозиҳои 5-уми ҳамбастагии исломӣ ҳайати дастаи мунтахаби олимпии Тоҷикистон иборат аз 46 варзишгар аз рӯи 8 намуди варзиш ширкат карда, сазовори 8 медал – 3 нуқра ва 5 биринҷӣ – гардид.

Медалҳои нуқраро дар варзиши сабук Илдар Аҳмадиев дар мусобиқаи ҷаҳиш ба дарозӣ, дар пара-тенниси рӯи миз Екатерина Ишенко, дар намуди гӯштини дзюдо Комроншоҳ Устопириён дар вазни то 90кг ва медалҳои биринҷиро дар гӯштини юнонӣ-римӣ Асламҷон Азизов дар вазни то 55кг, Фирӯз Мирзораҷабов дар вазни то 63кг, дар намуди гӯштини дзюдо Шодмон Ризоев дар вазни то 81кг, Абубакри Акобир дар вазни то 100кг ва дастаи мунтахаби дзюдои Тоҷикистон дар сабқати даставӣ сазовор шуданд.

Зимни маросими пӯшидашавии бозиҳо Вазири ҷавонон ва варзиши Туркия Меҳмет Муҳаррам Касапоғлу зимни суханронӣ, аз ҷумла гуфт, ки «мо хеле шод будем, ки ҳазорон бародари худро дар Туркия пазироӣ намудем. Дар ин мусобиқаҳо ҳаргиз мағлуб набуд, бародарӣ ва ваҳдат ғолиб омад. Ҳамаи меҳмонон аз ин шаҳри муҳтарам — Қунияи Туркия бо хотираҳои фаромӯшнашаванда ба мамлакатҳои худ бармегарданд».


Шоҳзода Абдулазиз ибни Туркӣ ал-Файсал, раиси Федератсияи байналмилалии варзиши ҳамбастагии исломӣ (ISSF) ва президенти Кумитаи олимпии Арабистони Саудӣ ба ҳамаи онҳое, ки барои баргузории бозиҳо саҳм гузоштанд, изҳори сипос карда, гуфт: «Ҳамбастагӣ номи мост, сулҳ забони мост, мусобиқаи бошараф дар майдонҳои варзишӣ роҳи мост. Ташаккур ба Қуния».
Сипас, Касапоғлу парчами Федератсияи варзиши ҳамбастагии исломиро ба шоҳзода Абдулазиз ал-Файсал супорид.

Маросими пӯшидашавии бозиҳо бо барномаи ҳунарӣ анҷом ёфт.

Мавриди зикр аст, ки Бозиҳои 6-уми ҳамбастагии исломӣ соли 2025 дар пойтахти Камерун – шаҳри Йоунде доир хоҳанд шуд.

Дар Бозиҳои 5-уми ҳамбастагии исломӣ аз рӯи ҳисоби медалҳо кишвари мизбон – Туркия ҷои аввалро гирифт. Варзишгарони мизбон сазовори 341 медал (145 тилло, 107 нуқра, 89 биринҷӣ) гардиданд. Узбекистон бо 51 медали тилло, 42 нуқра, 65 биринҷӣ (158 медал) дар ҷои дуюм, Эрон бо 39 медали тилло, 44 нуқра, 50 биринҷӣ (133 медал) дар ҷои сеюм мавқеъ гирифтанд.

Дар даҳгона ҳамчунин Озарбойҷон (99), Қазоқистон (89), Марокаш (62), Индонезия (56), Қирғизистон (32), Баҳрайн (23), Алҷазоир (42) ҷой гирифтанд. Умуман, варзишгарони 44 давлат соҳиби медал, аз ҷумла 28 давлат соҳиби медали тилло шуданд.

Ҷумҳурии Тоҷикистон бо 3 медали нуқра ва 5 медали биринҷӣ миёни 54 кишвари иштирокчӣ дар ҷои 29-ум мавқеъ гирифт.


Хотиррасон мешавем, ки дар бозиҳои қаблии ҳамбастагии исломӣ Тоҷикистон ҳамагӣ 6 медал – 1 тилло, 1 нуқра, 4 биринҷӣ дошт. Медали тиллоро дар аввалин Бозиҳои ҳамбастагии исломӣ соли 2005 дар Макка Дилшод Назаров аз гурзандозӣ, медали нуқраро дар ҳамин бозиҳо Насҳиддин Ворисов дар намуди таэквондо ва 4 медали биринҷиро соли 2017 дар Боку варзишгарони мо дар варзишҳои зӯрхонаӣ сазовор гардида буданд.

АКС: КМО Тоҷикистон

Август 19, 2022 14:28

Хабарҳои дигари ин бахш

НИШАСТИ МАТБУОТӢ. Дар Донишкадаи тарбияи ҷисмонии Тоҷикистон факултаи «Гӯштини миллӣ» таъсис меёбад
ДЗЮДО. Дар Душанбе Чемпионати Тоҷикистон байни калонсолон баргузор мешавад
30-СОЛАГИИ ҚУВВАҲОИ МУСАЛЛАҲ. Бахшида ба ин сана дар Душанбе мусобиқаи варзишӣ оид ба футболи хурд оғоз гардид
БАХШИДА БА МАҚОМИ БАЙНАЛМИЛАЛӢ ГИРИФТАНИ ГӮШТИНИ МИЛЛИИ ТОҶИКӢ. Дар ноҳияи Панҷ мусобиқаи гӯштингирӣ доир карда шуд
«ҶОМИ РУШД-2023». Дастаи мунтахаби наврасони Тоҷикистон (U-17) бозиро бо Русия мусовӣ кард
БА ИСТИҚБОЛИ 35-СОЛАГИИ ИСТИҚЛОЛИ ДАВЛАТӢ. Дар Хуҷанд Мактаби махсуси варзишӣ оид ба камонварӣ бунёд мегардад
Дар шаҳри Душанбе маросими ҷоизасупории соҳаи кор бо ҷавонон дар соли 2022 баргузор карда мешавад
ҶОМИ ФЕДЕРАТСИЯ-2023. Шаш дастаи иштирокчии қисми ниҳоии он муайян гардиданд
Ҷоизадори Бозиҳои олимпӣ Юсуф Абдусаломов мураббии нави дастаи мунтахаби Тоҷикистон оид ба гӯштини тарзи озод шуд
Роҳбарияти Федератсияи футболи Тоҷикистон дар Конгресси 33-юми Конфедератсияи футболи Осиё иштирок кард
Футболбози тоҷик расман бозигари дастаи «Думиенсе»-и Португалия шуд
ФУТБОЛ. Аҳтам Назаров фаъолияти худро дар дастаи «Андиҷон»-и Узбекистон идома медиҳад

Маводҳои таҳлилӣ