Ба Сарраёсати ҳифзи муҳити зист дар вилояти Хатлон озмоишгоҳи сайёри экологӣ дастрас гардид

ДУШАНБЕ, 05.08.2022 /АМИТ «Ховар»/. Аз ҷониби Кумитаи ҳифзи муҳити зисти назди Ҳукумати Ҷумҳурии Тоҷикистон ба шуъбаи таҳлиливу ташхисии Сарраёсати ҳифзи муҳити зист дар вилояти Хатлон озмоишгоҳи сайёри экологӣ оид ба муайян намудани таркиби сифати ҳавои атмосфера дастрас гардид. Дар ин бора ба АМИТ «Ховар» дар Кумитаи мазкур хабар доданд.

Зимни тақдими озмоишгоҳи сайёри экологӣ муовини якуми Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Зарафо Қиёмзода изҳор намуд, ки «аз ин пас мутахассисони шуъбаи ташхис оид ба ифлосшавии ҳавои атмосферӣ метавонанд бо ин озмоишгоҳи сайёр аз ҳисоби манбаъҳои доимии ифлоскунанда ва манбаъҳои ҳаракаткунанда дараҷаи партовҳои газиро ба ҳавои атмосфера муайн созанд».

Дохили озмоишгоҳи сайёри экологӣ барои муайян намудани таркиби сифати ҳавои атмосфера бо технологияи муосир таҷҳизонида шудааст.

Сардори шуъбаи таҳлиливу ташхисӣ ва экпертизаи экологии Сарраёсати ҳифзи муҳити зист дар вилояти Хатлон Ҷӯрабек Мирзохонов иттилоъ дод, ки «озмоишгоҳи сайёри экологӣ сифати ҳавои атмосфериро аз рӯи 5 нишондиҳанда муайян мекунад. Аз ҷумла, дараҷаи ифлосшавӣ аз рӯи газҳои оксиди карбон, андигриди сулфур, оксиди нитроген, карбогидридҳо ва дуда санҷидаву муайян карда мешавад».

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон