Дар Душанбе нақшаи ҳаракати автобусхо дар хатсайри 33 тағйир ёфта, рақами хати сайри автобуси 13 иваз мешавад

ДУШАНБЕ, 31.08.2022. /АМИТ «Ховар»/. Мақомоти иҷроияи ҳокимияти давлатии шаҳри Душанбе ба таваҷҷуҳи сокинон ва меҳмонони пойтахт мерасонад, ки шуруъ аз 1 сентябри соли равон дар хатсайри автобусии №13 (кӯчаи Гагарин-маҳаллаи Авул) бе тағйири нақшаи ҳаракат рақами хати сайр иваз гардида, минбаъд ин хатсайр таҳти рақами 17 фаъолият менамояд. Дар ин бора ба АМИТ «Ховар» дар шуъбаи иттилоотии дастгоҳи Раиси шаҳри Душанбе хабар доданд.

Дар хатсайри автобусии №17 фаъолияти автобусҳо тавассути кӯчаву хиёбонҳои Гагарин, Рӯдакӣ, И. Сомонӣ, А. Сино, А. Ғуломов то маҳаллаи Авул роҳандозӣ мегардад.

Инчунин шуруъ аз 1 сентябр дар нақшаи ҳаракати хатсайри автобусии №33 низ тағйирот ворид гардида, фаъолияти автобусҳо тавассути кӯчаву хиёбонҳои Мастонгулов, А. Дониш, Дӯстии халқҳо, Н. Муҳаммад, Лоҳутӣ, Мирзо Турсунзода, Шотемур, Қ. Раҳимов, Меҳнат, Шарқ, Лоиқ Шералӣ, Рӯдакӣ ва Ҳофизи Шерозӣ то бозори Кушониён ба роҳ монда мешавад.

Аз шаҳрвандон хоҳиш карда мешавад, ки аз хизматрасонии автобусҳои муосири тамғаи «АКИА» истифода баранд.

Пардохти ҳаққи роҳкиро тариқи корти нақлиётӣ ба роҳ монда мешавад.

АКС аз бойгонӣ