ИДИ БУЗУРГИ ТИРАМОҲ. Оғози Чемпионати ҷаҳон оид ба футбол дар Қатарро ба моҳи ноябр гузарониданд

ДУШАНБЕ, 12.08.2022 /АМИТ «Ховар»/. Федератсияи байналмилалии футбол (ФИФА) санаи оғози Чемпионати ҷаҳон-2022 дар Қатарро як рӯз ба таъхир гузошт. Ба иттилои АМИТ «Ховар», дар ин бора дар сомонаи ФИФА хабар дода шудааст.

Бозии дастаҳои мунтахаби Қатар ва Эквадор ба рӯзи алоҳида – 20 ноябр гузаронида шуд. Қаблан бозӣ бояд дар ҳамон рӯз- 21 ноябр доир мешуд, ки вохӯриҳои Сенегал – Ҳолланд, Англия – Эрон, ИМА – Уэлс баргузор мешуданд.

Шурӯъ аз Чемпионати ҷаҳон- 2006 дар Олмон тамоми бозиҳои ифтитоҳӣ бо ширкати кишвари мизбони мусобиқот баргузор мешуданд. Аммо тақвими мусобиқоти Чемпионати ҷаҳон дар Қатар тавре тарҳрезӣ шудааст, ки мизбонон он рӯз танҳо дар бозии сеюми ҳисобӣ бозӣ менамоянд. Тавре дар ФИФА тавзеҳ доданд, тасмим дар бораи ба таъхир андохтани бозӣ «идомаи анъанаи тӯлониро таъмин мекунад». Федератсия таъкид кард, ки ҳамаи чиптаҳои харидашуда эътибор доранд.

Қисмати ниҳоии Чемпионати ҷаҳон- 2022 аз 21 ноябр то 18 декабр баргузор мешавад. Бозии ниҳоӣ 18 декабр дар варзишгоҳи «Лусаил» дар шаҳри ҳамноми он баргузор шуда, соати 20:00 ба вақти Душанбе оғоз мешавад. Бозӣ барои ҷойи сеюм як рӯз пеш дар Варзишгоҳи байналмилалии «Халифа» дар Ал-Райён соати 20:00 ба вақти Душанбе оғоз мешавад.

Чемпиони ҳозираи ҷаҳон дастаи мунтахаби Фаронса мебошад. Бар асоси қарори ФИФА, бошгоҳҳо ва дастаҳои Русия наметавонанд дар мусобиқоти байналмилалӣ ширкат кунанд. Ҳамин тариқ, дастаи Русия аз имкони роҳ ёфтан ба Чемпионати ҷаҳон оид ба футбол- 2022, ки дар Қатар баргузор мешавад, маҳрум гардид.

АКС: Kai Pfaffenbach / Reuters