БА ЗИММАИ ТУ МАСЪУЛИЯТИ БУЗУРГ — ХИЗМАТ ДАР САФИ ҚУВВАҲОИ МУСАЛЛАҲ ГУЗОШТА МЕШАВАД! Чунин хитоб кардаанд ҳизбиёни шаҳри Норак ба ҷавонони синни даъватӣ

Сентябрь 30, 2022 14:03

ДУШАНБЕ, 30.09.2022. /АМИТ «Ховар»/. Дўсти азиз! Ту акнун ҷавони ҳаждаҳсола шудӣ, ба камол расидӣ! Мувофиқи Қонуни Ҷумҳурии Тоҷикистон «Дар бораи уҳдадориҳои умумии ҳарбӣ ва хизмати ҳарбӣ» ба ту масъулияти бузург — хизмат дар сафи Қувваҳои Мусаллаҳ гузошта мешавад. Инсон дар ҳаёти худ якчанд рисолати ҷавонмардиро бояд иҷро намояд. Яке аз инҳо хизмат ба Ватан аст, чунин дарҷ ёфтааст дар варақаҳои иттилоотие, ки бо ташаббуси ТҶҶ «Созандагони Ватан» ва волонтёрони назди Кумитаи иҷроияи Ҳизби Халқи Демократии Тоҷикистон дар шаҳри Норак дастраси ҷавонони синну соли даъватӣ гардиданд.

Тавре АМИТ «Ховар» бо истинод ба Кумитаи иҷроияи ҲХДТ дар шаҳри Норак иттилоъ медиҳад, варақаҳои мазкур таҳти шиори «Ҳифзи Ватан — Модар қарзи ҷавонмардии мост!» дар кўча ва бозори марказии шаҳр ба ҷавонон тақсим карда шуданд.

«Ватан ин ҳамон қаламравест, ки дар тўли ҳазорсолаҳо аҷдодони мо дар он умр ба сар бурдаанд, ин ҳамон сарзаминест, ки ниёгони мо ҳар ваҷаб хоки онро муқаддас шуморида, барои ҳифзаш бо ғосибони аҷнабӣ, кишваркушоёни ҳарису зарпараст ҷангида, хун рехтанд, дар роҳи ҳифзи нангу номуси хеш шаҳид шуданд ва дар он қаламрави меҳрпарвар, ки имрўз Тоҷикистон ном дорад, ба хоки абадӣ рафтаанд», -омадааст дар варақаи иттилоотӣ.

Дар варақаи мазкур ҳамчунин ба даъватшавандагон чунин хитоб шудааст: «Акнун дар сафи Қувваҳои Мусаллаҳ масъулияти басо бузург, яъне хизмати Ватан ба зимаат гузошта мешавад. Артиш мактаби бузурги матонату мардонагӣ ва далериву шуҷоат мебошад. Пайваста кўшиш намо, ки дар давоми хизмати ҳарбӣ худатро ҷисману руҳан обутоб диҳӣ. Супоришҳои ҳарбиро бо дили соф, саривақт ва сарбаландона иҷро намо!».

Ёдовар мешавем, ки аз 1 октябр даъвати тирамоҳии шаҳрвандон ба хизмати ҳатмии ҳарбӣ оғоз мегардад. Ба ин муносибат чанд рўз пеш бо иштироки масъулини мақомоти вобастаи давлатии даъват, ҳайатҳои роҳбариву фармондеҳии Вазорати мудофиаи ҷумҳурӣ, комиссарони ҳарбии вилоятҳо ва шаҳру ноҳияҳои мамлакат ҷамъомаду ҳамоишҳои гуногуни пеш аз даъватӣ баргузор гардиданд.

Дар ҷаласае, ки бо ҷалби комиссарони ҳарбии вилоятҳо ва шаҳру ноҳияҳои ҷумҳурӣ дар пойгоҳи қисми низомии Ситоди генералии Қувваҳои Мусаллаҳ баргузор гардид, дар он дар доираи Қонуни Ҷумҳурии Тоҷикистон «Дар бораи уҳдадории ҳарбӣ ва хизмати ҳарбӣ» иҷрои талаботи фармони Президенти Ҷумҳурии Тоҷикистон муҳтарам Эмомалӣ Раҳмон дар бораи даъвату гусели шаҳрвандон ба сафи Қувваҳои Мусаллаҳ баррасӣ шуд.

Супориши қатъӣ дода шуд, ки масъулини ин чорабинии муҳими сиёсӣ, пеш аз ҳама, ҳамкориро бо мардум ҷоннок намуда, ба масоили ташкилу ба роҳ мондани сифати даъват диққати аввалиндараҷа диҳанд ва дар ҳамоҳангӣ бо мақомоти иҷроияи ҳокимияти давлатии шаҳру ноҳияҳо тамоми шароити заруриро барои ҳайати комиссияҳои даъватӣ муҳайё созанд. Илова бар ин, дастур дода шуд, ки вобаста ба муроҷиати мардум дар доираи талаботи қонунҳои амалкунанда сари вақт қарори дахлдор қабул намоянд.

Таъкид гардид, ки масъулини мақомоти вобастаи давлатии даъват ба омӯзиши шахсияти даъватшавандагон, ташхису муоинаи тиббӣ, ҷалби ҳарчӣ бештари фарзандони шахсони мансабдор, пешгирӣ аз ҷинояту роҳҳои ғайриқонунии даъват, омода кардани мутахассисон барои Қувваҳои Мусаллаҳ дар Ташкилоти ҷамъиятии мададгори мудофиа, риояи дурусти пӯшидани сару либоси низомӣ, ташкилу роҳандозӣ намудани дарсу машғулияти соҳавӣ ва ба масоили муомилаву муносибати хуб бо шаҳрвандон диққати ҷиддӣ зоҳир намуда, кӯшиш намоянд, ки ҷавонони солиму бардам ва болаёқатро интихоб ва ба сафи Артиши миллӣ равона созанд.

Рухсораи НУР,
АМИТ «Ховар»

Акс: маркази матбуот ва таҳлили дастгоҳи КМ ҲХДТ дар шаҳри Норак

Сентябрь 30, 2022 14:03

Хабарҳои дигари ин бахш

Дар Душанбе ҷаласаи мақомоти ҳифзи ҳуқуқ доир шуд
Президенти Тоҷикистон: «Ҳифзи сулҳи пойдор вазифаи муқаддаси ҳар фарди ҷомеа мебошад»
Дар Суғд ҷаласаи Шурои ҳамоҳангсози фаъолияти мақомоти ҳифзи ҳуқуқ доир шуд
Нақшаи даъвати баҳории шаҳрвандон ба сафи Артиши миллӣ 100 фоиз иҷро гардид
Ба сокинони шаҳри Роғун риояи талаботи қонунгузорӣ дар самти истифодаи самараноки неруи барқ фаҳмонида мешавад
Судяҳои Суди Олии Тоҷикистон дар форуми байналмилалӣ иштирок намуданд
Ҳайати Тоҷикистон дар ҷаласаи раисони судҳои олии давлатҳои аъзои Созмони ҳамкории Шанхай иштирок намуд
Оид ба татбиқи барномаҳои давлатии Тоҷикистон дар пешгирии экстремизм ва терроризм конфронси ҷумҳуриявӣ доир шуд
Дар Душанбе оид ба истифодаи технологияҳои ҳастаӣ ва бехатарии радиатсионӣ конференсияи байналмилалӣ доир шуд
Тоҷикистон ва Эрон нақша доранд ҳамкориро дар самти мубориза бо ҷинояткории муташаккили фаромиллӣ густариш диҳанд
Байни Тоҷикистон ва Қирғизистон оид ба рафъи ҳолатҳои фавқулода Ёддошти тафоҳум ба имзо расид
Дар Душанбе масъалаи арзёбии фаврӣ ва ҳамоҳангсозии ҳолатҳои фавқулода баррасӣ гардид