ҲАМЛАИ ТАҶОВУЗКОРОНАИ ҚИРҒИЗИСТОН. «Ҷониби қирғиз бар зидди Тоҷикистон маъракаи бесобиқаи иттилоотӣ роҳандозӣ кардааст» — муовини Вазири корҳои хориҷии мамлакат Содиқ Имомӣ
ДУШАНБЕ, 19.09.2022 /АМИТ «Ховар»/. Рӯзҳои охир ҷониби Қирғизистон маъракаи иттилоотии бесобиқаро дар ВАО на танҳо дар минтақаи мо, балки дар хориҷ аз он низ роҳандозӣ кардааст. Дар ин бора имрӯз дар Душанбе муовини Вазири корҳои хориҷии Тоҷикистон Содиқ Имомӣ зимни нишасти хабарӣ барои намояндагони корпуси дипломатӣ, созмонҳои байналмилалӣ ва воситаҳои ахбори омма изҳор намуд.
Ба гуфтаи ӯ, ҳамсояи мо нисбат ба Ҷумҳурии Тоҷикистон ҳар гуна изҳорот дода, «риторикаи таҷовузкорона» истифода мебарад. «Агар ин маъракаро дар расонаҳо арзёбӣ намоем, онро ҳамчун ҷузъи сиёсати таҷовузкорона мебинем, ки солҳои охир аз ҷониби роҳбарияти Қирғизистон ба таври ошкоро идома дорад», — иброз дошт муовини Вазири корҳои хориҷии мамлакат.
Содиқ Имомӣ зикр намуд, ки амали таҷовузкоронаи Ҷумҳурии Қирғизистонро нисбат ба тамомияти арзӣ ва дахлнопазирии сарҳади давлатии Ҷумҳурии Тоҷикистон инъикос карда, мо, ҳамчун ҷониби зарардида, аз равандҳои воқеӣ хулоса мебарорем, кишвари таҷовузкор бошад ҳамлаи мусаллаҳонаи аҳдшиканонаро на танҳо пешакӣ тарҳрезӣ кардааст, балки ҳамаи онро мутаносибан дар ВАО пӯшиш медиҳад.
Муовини Вазири корҳои хориҷии ҷумҳурӣ зикр кард, ки то ҳол, сарфи назар аз ҳолатҳои даргириҳои қаблӣ, ҷониби Тоҷикистон ҳамеша эҳтиёткор буда, инро дар расонаҳо саҳеҳ ва воқеъбинона инъикос менамояд. «Дар баробари ин, мо бо назардошти он ки қудрати ВАО бузург аст, нахостем сабаби ташаннуҷи вазъ гардем», — гуфт ӯ.


«Пояи дигаре, ки сиёсати иттилоотии мо бар он асос ёфтааст, ин аст, ки мо бо қирғизҳо асрҳо боз бо ҳам зиндагӣ мекунем. Итминон дорам, ки ин рӯзҳо низ мегузаранд ва таърих боқӣ мемонад. Дар ҳеҷ сурат мо набояд дар ҷомеа симои «душман»-ро дар тимсоли мардуми қирғиз эҷод кунем. Ин комилан қобили қабул нест. Аммо ҳамсояҳои мо тамоман баръакс амал менамоянд. Тибқи маълумоти мо, дар Бишкек ва дигар шаҳрҳои Қирғизистон шаҳрвандони Тоҷикистонро аз рӯи мансубияти нажодӣ, бидуни ишора ба шаҳрвандӣ, муайян карда, нисбат ба онҳо амалҳои зӯроварии ғайриқонунӣ содир менамоянд, онҳоро лату кӯб карда, ба самти номаълум мебаранд. Ин аст натиҷаи «маъракаи иттилоотӣ»-и таҷовузкорона бар зидди Тоҷикистон», — тазаккур дод Содиқ Имомӣ.
14-18 сентябр Қӯшунҳои сарҳадии Кумитаи давлатии амнияти миллии Ҷумҳурии Қирғизистон бе ягон сабаб нисбат ба Ҷумҳурии Тоҷикистон амалиёти таҷовузкоронаи мусаллаҳона анҷом доданд. Дар ҷараёни ин амалиёти таҷовузкорона ҷониби Қирғизистон аз миномёт, пулемёт ва дигар аслиҳаи оташфишон, ҳавопаймоҳои бесарнишини зарбазанандаи «Байрактар ТБ2» ва симтемаҳои мушакии зарбазананда истифода кард.
Маълумоти муфассали расмӣ дар бораи амалҳои таҷовузкоронаи Ҷумҳурии Қирғизистон нисбат ба тамомияти арзӣ ва дахлнопазирии сарҳади давлатии Ҷумҳурии Тоҷикистон ва хронологияи рӯйдодҳо дар сомонаи Вазорати корҳои хориҷии Тоҷикистон нашр шудааст.
Пайрав ҚОСИМ,
АМИТ «Ховар»
АКС: АМИТ «Ховар»








Масоили рушди ҳамкорӣ дар соҳаҳои энергетика ва захираҳои об байни Тоҷикистону Умон баррасӣ гардид
Дар Санкт-Петербург вохӯрии намояндаи бахши тиҷоратии Тоҷикистону Русия баргузор гардид
Сафири Тоҷикистон бо устондори Ал-Осимаи Кувайт вохӯрӣ намуд
Дар Душанбе ҳамкории Тоҷикистон ва Иёлоти Муттаҳидаи Амрико баррасӣ гардид
Директори АМИТ «Ховар» бо Сафири Туркия дар Тоҷикистон вохӯрӣ намуд
Дурнамои рушди ҳамкории Тоҷикистону Умон дар самтҳои иқтисоду тиҷорат баррасӣ гардид
Сафири Тоҷикистон бо муовини парлумонии Вазири корҳои хориҷии Ҷопон мулоқот намуд
Донишҷӯёни тоҷик дар Донишгоҳи Кувайт тавассути бурсия таҳсил менамоянд
Рӯзи Президенти Ҷумҳурии Тоҷикистон ва 15-солагии ифтитоҳи бинои Сафорат дар шаҳри Берлин таҷлил гардид
Сарвазири Покистон бо Вазири корҳои хориҷии Тоҷикистон вохӯрӣ намуд
Ҳайати Тоҷикистон дар ҷаласаи вазирони корҳои хориҷии Созмони ҳамкории иқтисодӣ иштирок намуд
Сафири Тоҷикистон бо Мудири кулли идораи амлок ва абнияи вазорати корҳои хориҷии Эрон вохӯрӣ намуд






