ҶОМИ ОСИЁ ОИД БА ФУТЗАЛ. Дастаҳои мунтахаби Тоҷикистон ва Узбекистон бо ҳам рақобат карданд

ДУШАНБЕ, 30.09.2022. /АМИТ «Ховар»/. Дастаи мунтахаби футзали Тоҷикистон дар даври дуюми марҳилаи гурӯҳии Ҷоми Осиё-2022 оид ба футзал дар гурӯҳи  «В» аз яке дастаҳои пурқуввати мусобиқа-тими миллии Узбекистон бо ҳисоби 2:3 мағлуб шуд. Футзалбозони мо дар қисми дуюми ин вохӯрӣ аз рақиб дида, хеле хуб бозӣ карданд ва якчанд имконияти голзанӣ ба вуҷуд оварданд, вале зарбаҳои футзалбозони тоҷик ба сутуни дарвоза бархӯрд, хабар медиҳад шореҳи варзиши АМИТ «Ховар»  бо истинод ба  Федератсияи футболи Тоҷикистон.

Голҳои дастаи мунтахаби Тоҷикистонро   Файзалӣ Сардоров дар бозӣ бо дастаи мунтахаби  Узбекистон  ба нишон расонид. Баъди ду давр дастаи мунтахаби  Узбекистон бо касби шаш имтиёз дар ҷадвали гурӯҳи «В» пешсаф аст. Дастаи мунтахаби Тоҷикистон се имтиёз дорад.

Дар даври ниҳоии марҳилаи гурӯҳии Ҷоми Осиё-2022  1 октябр дастаи мунтахаби  Тоҷикистон бо дастаи миллии Туркманистон бозӣ мекунад. Вохӯрӣ соати 13:00 ба вақти Душанбе оғоз мешавад. Барои ба даври чорякниҳоӣ баромадан дастаи моро дар ин вохӯрӣ ҳадди ақалл ҳисоби мусовӣ басанда аст.

Мавриди зикр аст, ки аз ин  пештар  футзалбозони бомаҳорати  тоҷик   27 сентябр дар даври аввали бозиҳои гурӯҳи «В» бар дастаи мунтахаби Баҳрайн бо ҳисоби 4:3 пирӯз шуданд. Голҳои Умед Кузиев, Бахтиёр Солиев, Файзалӣ Сардоров ва Идрис Ёров ба дастаи мо се имтиёз оварданд.

Дар вохӯрии дигари гурӯҳи «В» дастаи мунтахаби Узбекистон бар  дастаи мунтахаби Туркманистон бо ҳисоби 8:0 зафар ёфт.

Ҷоми Осиё 2022 оид ба футзал

Гурӯҳи «В». Даври 2

ТОҶИКИСТОН – Узбекистон – 2:3

Голҳо: Элбек Тулкинов, 3 (0:1). Файзалӣ Сардоров, 4 (1:1). Ҳусниддин Нишонов, 6 (1:2). Анасхон Рахматов, 18 (1:3). Файзалӣ Сардоров, 37 (2:3).

29 сентябр. Кувайт. Маҷмааи варзишии «Саъд Ал-Абдулло».

Туркманистон – Баҳрайн – 4:4                                                                                                                

Акс: ФФТ