Пешвои миллат: «Модарон ба духтарон қабл аз издивоҷ бояд расму оини оиладорӣ ва тарзи дуруст тайёр кардани хӯрокҳои миллиро омӯзонанд»

Сентябрь 3, 2022 15:09

ДУШАНБЕ, 03.09.2022 /АМИТ «Ховар»/. Имрӯз зарур аст, ки волидон дар тарбияи фарзандон ба таври ҷиддӣ муносибат намоянд. Баъди ба балоғат расидани фарзандон модарон бо духтарон ва падарон бо писарон бештар кор карда, барои фардои дурахшони онҳо замина гузоранд. Хусусан занону бонувон ба духтарон қабл аз издивоҷ расму оини оиладорӣ ва тарзи дуруст тайёр кардани хӯрокҳои миллиро омӯзонанд. Ҷавондухтар ақаллан бояд се-чор намуд хӯроки миллӣ омода карда тавонад. Бисёре аз ҷавонон баъди чор-панҷ маротиба истеъмол намудани хӯроки шӯр ё бемазза аз баҳри зиндагӣ мегузаранд ва хонаводаи ҷавон пароканда мешавад.

Доир ба ин масъалаи муҳими зиндагӣ Пешвои миллат муҳтарам Эмомалӣ Раҳмон 1 сентябр зимни суханронӣ дар Рӯзи дониш ва ифтитоҳи бинои асосии Донишгоҳи давлатии тиббии Тоҷикистон ба номи Абуалӣ ибни Сино дар шаҳри Душанбе иброз доштанд.

Сарвари давлат дар идома ба аҳли маориф, падару модарон, зиёиёну фаъолон ва умуман аҳли ҷомеа муроҷиат карда, таъкид намуданд, ки масъалаи таълиму тарбияи наврасону ҷавонон ва соҳиби касбу ҳунар гардонидани онҳоро дар мадди аввал гузоранд.

Ба таъкиди Президенти мамлакат муҳтарам Эмомалӣ Раҳмон, «мо тамоми шароит ва имкониятро фароҳам овардаем, то насли наврас, ки ояндаи ин миллату давлат мебошад, илм омӯзад, дониш гирад, соҳиби касбу ҳунар гардад ва дар зиндагӣ ба мушкилиҳо рӯ ба рӯ нашавад. Барои ин падару модарон бояд ба онҳо таваҷҷуҳи бештар зоҳир кунанд, кумак расонанд, барои интихоби дурусти касб онҳоро роҳнамоӣ кунанд».

«Мо, падару модарон бояд ҳаргиз фаромӯш насозем, ки ояндаи Тоҷикистон ва фардои давлату миллат ба фарзандону набераҳои мо – наврасону ҷавонон тааллуқ дорад. Мутаассифона, волидоне ҳастанд, ки бо фарзандон сари як дастархон нишаста, ҳамроҳ хӯрок намехӯранд, ба онҳо одоби рафтору гуфтор ва муомилаи дурустро намеомӯзонанд. Пас ин фарзандон чӣ гуна тарбия мегиранд, бо кадом роҳ аз одитарин одоби оилаву оиладорӣ огоҳ мегарданд ва хонаводаи мустаҳкам барпо мекунанд»,-изҳор доштанд Пешвои миллат муҳтарам Эмомалӣ Раҳмон.

Масъалаи таълиму тарбияи фарзандон ҳамеша дар маркази диққати Президенти Тоҷикистон қарор дошта, бо ин мақсад дар мамлакати мо Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» қабул гардидааст.

14 декабри соли 2010 Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон лоиҳаи Қонун «Дар бораи масъулияти падару модар дар таълиму тарбияи фарзанд» -ро ба муҳокимаи умумихалқӣ пешниҳод карда буданд.

«Дар давраи ҷаҳонишавии босуръати мушкилоти башарият ва омезиши арзишҳо, вақте ки нақш ва таъсири таълиму тарбия ҳамчун маҳаки иҷтимоии рушди инсон ва таҳкими сармояи зеҳнӣ пояҳои ҷомеаи навро фароҳам месозад, қабули чунин санади муҳим иқдоми саривақтист», — изҳор дошта буданд муҳтарам Эмомалӣ Раҳмон зимни мулоқот бо аҳли ҷомеаи ҷумҳурӣ оид ба муҳокимаи лоиҳаи қонун 14 декабри соли 2010.

Ба гуфтаи Пешвои миллат, лоиҳаи қонун ба баланд бардоштани масъулияти волидон дар таълиму тарбияи фарзандон ва ба ҳаёти мустаҳқилона омода кардани онҳо нигаронида шудааст.

Сарвари давлат таъкид карданд, ки таълим ва тарбия дар ҷараёни ҳамкории зичи се шохаи иҷтимоӣ: оила, мактаб ва ҷомеа сурат хоҳад гирифт.

«Баъзе волидон тарбияи фарзандро масъулияти мактаб мешуморанд ва ба ин мушкилот назари хеле сатҳӣ доранд. Аксари онҳо тасаввурот надоранд, ки фарзандонашон дар мактаб чӣ кор мекунанд ва вақти холии худро чӣ гуна мегузаронанд», — зикр намуданд Президенти мамлакат.

Сарвари давлат пайваста ба зарурати таъмини муттасилии анъанаҳои беҳтарини ахлоқӣ ва одоби ҳамида, ки аз насл ба насл интиқол меёбанд, таваҷҷуҳ зоҳир менамоянд.

Саидҷаъфар АШӮРЗОДА,
АМИТ «Ховар»

АКС: Хадамоти матбуоти Президенти ҶТ/АМИТ «Ховар»

Сентябрь 3, 2022 15:09

Хабарҳои дигари ин бахш

Маркази тадқиқоти стратегии Тоҷикистон ва Гурӯҳи муассисаҳои MERI-и Ҳиндустон ҳамкориро тақвият мебахшанд
РӮЗИ ҶАҲОНИИ КОҲИШИ ХАТАРИ ОФАТҲОИ ТАБИӢ. Барои пешгирӣ аз пайомадҳои офатҳои табиӣ шаҳрвандон низ бояд масъулиятшинос бошанд.
Байни Маркази тадқиқоти стратегии Тоҷикистон ва Институти Чин ва Осиёи муосири Академияи илмҳои Русия Ёддошти тафоҳуми ҳамкорӣ ба тасвиб расид
Тавассути «Почтаи Тоҷикистон» беш аз 27 миллион рӯзномаю маҷалла ба мизоҷон расонида шуд
Дар Душанбе Форуми дуюми коршиносии «Осиёи Марказӣ – Русия: рӯзномаи рушди муштарак» ба кори худ оғоз намуд
СИРДАРЁ МУТТАҲИД МЕНАМОЯД. Дар Гулистон Форуми сеюми ҷавонони ҳавзаи дарёи Сир – 2025 баргузор мегардад
ГРАНТИ ПРЕЗИДЕНТӢ. Ба 200 нафар занон — ғолибони лоиҳаҳои гранти президентӣ дар соли 2025 Диплом супорида шуд
Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон бо Вазорати маорифи Русия Ёддошти тафоҳум ба имзо расонд
Ёддошти тафоҳуми ҳамкорӣ байни Ваколатдор оид ба ҳуқуқи инсон дар Ҷумҳурии Тоҷикистон ва Кумитаи миллӣ оид ба ҳуқуқи инсони Давлати Қатар ба имзо расид
Дар Хуҷанд доир ба баланд бардоштани маърифати ҳуқуқии ҷавонон ҳамоиш баргузор гардид
Татяна Москалкова бо мақомоти Ваколатдор оид ба ҳуқуқи инсон дар Ҷумҳурии Тоҷикистон шинос шуд
Байни вазоратҳои тандурустии Тоҷикистон ва Русия Харитаи роҳ барои солҳои 2026-2027 ба имзо расид