ҲАДИСИ МУСАВВАР. Дар Душанбе Форуми соҳибкории Тоҷикистон ва Беларус доир шуд

ДУШАНБЕ, 12.10.2022 /АМИТ «Ховар»/. Дар доираи сафари расмии Президенти Ҷумҳурии Беларус Александр Лукашенко ба Ҷумҳурии Тоҷикистон дар шаҳри Душанбе бо иштироки беш аз 150 нафар соҳибкорону тоҷирони ду давлат Форуми соҳибкории Тоҷикистон ва Беларус доир гардид. Созмондиҳандагони он палатаҳои савдо ва саноати Тоҷикистону Беларус ва Кумитаи давлатии сармоягузорӣ ва идораи амволи давлатии Ҷумҳурии Тоҷикистон мебошанд, хабар доданд ба АМИТ «Ховар» дар кумитаи мазкур.

Дар Форуми соҳибкорӣ, ки барои ба сатҳи нав баровардани ҳамгироии кишварҳо мусоидат менамояд, роҳбарони мақомоти давлатӣ, корхонаву ширкатҳо ва доираҳои соҳибкорию сармоягузории Тоҷикистон ва Беларус иштирок намуда, масъалаҳои марбут ба таҳкими ҳамкории иқтисодию тиҷоратиро миёни ду кишвар баррасӣ намуданд.

Муаррифии имконияти сармоягузории Тоҷикистон, таҳкими робитаҳо миёни доираҳои тиҷоратии ду кишвар, инчунин ҷалби сармоя бо мақсади бунёди корхонаҳои санотӣ аз ҳадафҳои асосии Форуми соҳибкорӣ буд. Дар доираи он намоиши молу маҳсулоти Беларус таҳти унвони «Made in Belarus» ташкил гардид, ки дар он беш аз 60 корхонаи истеҳсолии Беларус дастовардҳои соҳаҳои гуногуни саноат, назири растанипарварӣ ва чорводорӣ, хӯрокворӣ, нӯшокиҳо, қаннодӣ, мошинсозии соҳаи кишоварзӣ, сайёҳии фароғатӣ ва тиббӣ, инчунин маорифро ба намоиш гузоштанд.

Дар ҳошияи Форум вохӯрии дуҷонибаи соҳибкорони ду давлат дар сиғаи B2B баргузор гардида, миёни корхонаю ширкатҳои истеҳсолии ду кишвар санадҳои нави ҳамкорӣ ба имзо расонида шуданд.

Дар зер аксҳои намоишгоҳи мазкур пешниҳод мешаванд:

АКС: Кумитаи давлатии сармоягузорӣ ва идораи амволи давлатии Ҷумҳурии Тоҷикистон