Дар вилояти Суғд корхонаи нави металлургӣ бунёд мегардад

ДУШАНБЕ, 26.10.2022 /АМИТ «Ховар»/. Ба истиқболи 35-солагии Истиқлолияти давлатии Ҷумҳурии Тоҷикистон аз ҷониби корхонаи муштараки «Зарафшон» корхонаи нави металлургӣ бунёд гардида истодааст, ки то имрӯз 95 фоизи корҳои он ба анҷом расонида шудаанд. Дар ин бора дирӯз зимни мулоқоти Раиси вилояти Суғд Раҷаббой Аҳмадзода бо директори генералии корхонаи муштараки «Зарафшон» Жан Яомин хабар дода шуд.

Тавре ба АМИТ «Ховар» дар Хадамоти матбуоти Раиси вилояти Суғд иттилоъ доданд, зимни вохӯрӣ ҷонибҳо оид ба фаъолияти корхонаи калони саноатӣ, вазъи корҳои сохтмонии корхонаи нави металлургӣ ва иҷрои уҳдадориҳои корхона мубодилаи афкор намуданд.

Зикр гардид, ки дар корхона 2566 нафар коргарон фаъолият дошта, маоши хуб мегиранд.

Раиси вилоят иброз дошт, ки саҳми корхона дар ташаккули маҷмӯи маҳсулоти саноатии шаҳру вилоят назаррас буда, бояд ҳаҷми истеҳсоли маҳсулот нисбат ба соли гузашта зиёд карда шавад. Иттилоъ дода шуд, ки бо мақсади таъмини иҷрои дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон ва саҳм гузоштан дар татбиқи ҳадафи чоруми миллӣ-саноатикунонии босуръати кишвар аз ҷониби корхонаи муштараки «Зарафшон» корхонаи нави металлургӣ бунёд гардида истодааст.

Барои корхонаи нав таҷҳизот ва техникаву технологияҳои муосир дастрас гардидаанд. Дар назар аст, ки корхонаи нав ба истиқболи 35-солагии Истиқлолияти давлатии Ҷумҳурии Тоҷикистон ба истифода дода шавад.

Ҷонибҳо ҳамчунин доир ба иҷрои уҳдадориҳои корхонаи саноатӣ, бартарафсозии камбудиҳои мавҷуда дар истеҳсолот ва зиёд намудани ҳаҷми истеҳсоли маҳсулот ибрози назар намуданд.

АКС: Хадамоти матбуоти Раиси вилояти Суғд