ДАЪВАТИ ТИРАМОҲӢ. 60 нафар ҷавонони Файзобод ба сафи муҳофизони Артиши миллӣ пайвастанд

Октябрь 6, 2022 14:30

ФАЙЗОБОД, 06.10.2022 /АМИТ «Ховар»/.  Дар назди бинои комиссариати ҳарбии ноҳияи Файзобод маросими Рӯзи даъватшаванда бо шукӯҳу шаҳомати хосса баргузор гардида, 60 нафар ҷавонони синни даъватӣ бо дуои неки падару модарон  ба сафи Қувваҳои мусаллаҳи Ҷумҳурии Тоҷикистон шомил гардиданд.  Дар ин бора аз Мақомоти иҷроияи ҳокимияти давлатии ноҳияи Файзобод ба хабарнигори АМИТ  «Ховар» Субҳониддини МАҲМУД иттилоъ доданд.

Раиси ноҳияи Файзобод  Бобишо Холзода  дар ҷамъомад ба даъватшавандагон муроҷиат намуда, гуфт, ки «хизмат ба Ватан — Модар бояд барои ҳар ҷавон ифтихору шараф бошад. Ватанро мисли модари хеш дӯст доштан ва чун гавҳараки чашм эҳтиёт намудан қарзи ҳар фарзанди миллат аст. Ватан муқаддастарин ганҷи ҳастӣ ва истиқлолият неъмати бебаҳои миллат аст. Хизмат дар сафи Артиши миллӣ барои ҷавонон мактаби ҳаёт ва ҷасорати мардонагӣ мебошад. Онҳо маҳз дар давраи хизмат имкон доранд, ки моҳияти мафҳуми Ватан, давлат ва миллати худро ба хубӣ дарк карда, сабақи далериву шуҷоат ва садоқат омӯзанд. Имрӯз ба шумо, ҷавонони соҳибиродаи ватан  шарафи бузург аст, ки марзу буми Тоҷикистонро ҳифз менамоед.  Пешвои миллат муҳтарам Эмомалӣ Раҳмон ба неруи созанда ва бузурги ҷавонони саодатманд ва ҳимоятгарони хоки аҷдодӣ бовар дошта, амнияту субот ва пешрафту шукуфоии мамлакатро дар ҳисси баланди меҳанпарастӣ ва бозувони қавии шумо мебинанд. Итминон дорем, ки қарзи худро дар назди Модар — Ватан бо сари баланд адо менамоед».

Хурсандиовараст, ки имсол аз ҳисоби Мақомоти иҷроияи ҳокимияти давлатии ноҳияи Файзобод 42 нафар  ва аз ҳисоби Вазорати мудофиа 10 нафар ҷавонони синни даъватӣ курси ронандагии ТҶММ «Мададгори мудофиа» – ро  хатм намуда, ҳамчун мутахассис ба сафи Артиши миллӣ пайвастанд.

Падари яке аз давъватшавандагон Ибодулло Ёров  иброз намуд, ки “солҳои охир зиёд гардидани шумораи ҷавонони  ихтиёрӣ, ки  ба сафи Қувваҳои Мусаллаҳи ҷумҳурӣ  мепайванданд, шоистаи таҳсин аст. Ҳамчун падар дарк менамоям, ки  ҷавонон бо камоли ифтихор ва нангу номуси ватандорӣ омодаи хизматанд ва ба хубӣ дарк  намудаанд, ки ҳимояи марзу буми Ватан қарзи фарзандӣ ва мояи ифтихори ҳар ҷавонмард аст”.


Аскарбача Муҳиддин Мақсудов  гуфт, ки «мо пайравони Пешвои миллатем. Ҳифзи марзу бум ва таъмини амнияти мардуми мамлакати азизамонро вазифаи муқаддаси худ медонем ва чун Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тамоми ҳастии хешро ба ҳифзи Ватан мебахшем».

Дар анҷоми маросим модарони аскарбачагон маросими кулчагазон доир намуда, дар барномаи ҳунарӣ бо фарзандонашон хушҳолӣ карданд.

АКС: Мақомоти иҷроияи ҳокимияти давлатии ноҳияи Файзобод

Октябрь 6, 2022 14:30

Хабарҳои дигари ин бахш

Жапаров омодагии худро барои ҳалли масъалаи минтақаҳои баҳсноки марз бо Тоҷикистон эълом кард
Нишасти навбатии СААД соли 2023 дар Минск баргузор мешавад
Дар Академияи Вазорати корҳои дохилии Тоҷикистон оид ба пешгирии киберҷинояткорӣ конференсияи байналмилалӣ доир шуд
Имрӯз дар Ереван ҷаласаи навбатии Шӯрои амнияти дастҷамъии СААД баргузор мешавад
Сергей Наришкин: «Россия ва Тоҷикистон минбаъд низ барои таъмини амнияти минтақавӣ ва миллии ду давлат тадбир меандешанд»
Ҳайати Тоҷикистон дар Конфронси вазирон барои мубориза бар зидди маблағгузории терроризм ширкат варзид
«ХИЗМАТ ДАР САФИ ҚУВВАҲОИ МУСАЛЛАҲ ВАЗИФАИ ШАҲРВАНДИИ ҲАР ЯКИ МОСТ». Дар Донишкадаи ҳарбӣ таҳти ин унвон Рӯзи дарҳои кушод гузаронида шуд
142 нафар сарбозони Вазорати корҳои дохилӣ баъди анҷоми давраи касбомӯзӣ соҳиби шаҳодатнома шуданд
106 нафар наваскарони даъвати тирамоҳӣ аз 3 қисми ҳарбӣ савганди садоқат ёд карданд
ТОЛИБОН ҲУКУМАТИ ХУДРО ФАРОГИР НАКАРДАНД. Аз ин рӯ онҳоро аз иштирок дар «сиғаи москвагӣ»-и нишаст доир ба Афғонистон маҳрум намуданд
Дар Эрон афроди номаълум дар бозор тир кушоданд ва панҷ нафар ҳалок гардид
Дар Истанбул таркишҳо ба амал омада, се мошин оташ гирифт