Намоишгоҳи 132–юми маҳсулоти воридотӣ ва содиротии Чин оғоз гардид

ДУШАНБЕ, 18.10.2022 /АМИТ «Ховар»/. Тибқи иттилои шуъбаи масъалаҳои тиҷоратӣ–иқтисодии Сафорати Ҷумҳурии Мардумии Чин дар Ҷумҳурии Тоҷикистон, 15 октябр Намоишгоҳи 132–юми маҳсулоти воридотӣ ва содиротии Чин ба шакли маҷозӣ аз рӯйи сиғаи электронии зерин https://www.cantonfair.org.cn/zh-CN оғоз гардид.

Тавре ба АМИТ «Ховар» дар Палатаи савдо ва саноати Ҷумҳурии Тоҷикистон хабар доданд, ярмаркаи мазкур ҳамчун бузургтарин намоишгоҳи муосир дар Осиё соле ду маротиба- дар фаслҳои баҳор ва тирамоҳ бо мақсади ҳавасмандгардонӣ ва рушди тиҷорати содиротию воридотӣ баргузор мегардад.

Мутобиқи нақшаи ҷониби Чин, намоишгоҳи мазкур  ним сол  дар шакли онлайн идома меёбад. Хоҳишмандон ҷиҳати иштирок дар он ва шиносоӣ бо молу маҳсулоти чинӣ метавонанд дар сиғаи электронии болозикр то 24 октябри соли 2022 худро номнавис намоянд.

Ҳамзамон хоҳишмандон метавонанд дар ҷараёни намоишгоҳ то 15 марти соли 2023 дар намоишҳои онлайнӣ, паёмнависии фаврӣ, бизнес-матчинг, конфронсҳои хидматӣ ва ғайра дар шакли маҷозӣ ширкат варзанд.

     АКС: Маркази матбуоти ПСС ҶТ