«БелТА»: Александр Лукашенко муносиботи муваффақона бо Тоҷикистонро шарҳ дода, гуфт, ки барои чӣ Эмомалӣ Раҳмонро эҳтиром мекунад

ДУШАНБЕ, 12.10.2022 /АМИТ «Ховар»/. Президенти Беларус Александр Лукашенко дар Душанбе бо Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода мулоқот анҷом дод, иттилоъ медиҳад аз Душанбе хабарнигори агентии «БелТА».

«Мардумони мо ба ҳамдигар монанданд. Ман ҳатто гуфта метавонам, ки аз ҳамдигар фарқе надоранд: инҳо одамони меҳрубон, меҳнатдӯст, боистеъдоданд. Ва дар ин замина мо дар равобити худ то андозае муваффақем», — гуфт Александр Лукашенко.

Сарвари давлат иброз дошт, ки бо Президенти Тоҷикистон Эмомалӣ Раҳмон беш аз чоряк аср боз шинос аст. «Ин роҳ барои мо осон набуд. Аммо шаби гузашта ман ба ӯ гуфтам: «Мо ҳамин қадар солҳо бо ҳам зиндагӣ кардем, аммо ман дар ёд надорам, ки боре ҳам сахт гап зада ё муноқиша карда бошем, мо ҳатто баҳс накардаем». Мо ҳамеша нисбат ба ҳамаи масъалаҳо мавқеи ягона доштем. Мо ҳамеша якдигарро дастгирӣ мекардем. Ин на аз он сабаб аст, ки мо дӯстем, балки аз он аст, ки мо дар ин бобат маҳз ҳамин хел фикр мекунем. Барои ман ӯ ҳамеша намунаи хизмат ба Ватан ва шахси фидокор буд», — таъкид кард Александр Лукашенко.

АКС: «БелТА»