ОБ ЗАХИРА НАМОЕД! Дар баъзе маҳаллаҳои шаҳри Душанбе интиқоли оби нӯшокӣ муваққатан қатъ мегардад

ДУШАНБЕ, 25.10.2022 /АМИТ «Ховар»/. Мақомоти иҷроияи ҳокимияти давлатии шаҳри Душанбе ба таваҷҷуҳи сокинони пойтахт мерасонад, ки бо мақсади гузаронидани корҳои таъмирӣ-профилактикӣ дар баъзе шаҳракҳо ва маҳаллаҳои ноҳияи Сино ва Фирдавсии шаҳри Душанбе интиқоли оби нӯшокӣ аз соати 23:00-и 25 октябр то соати 24:00-и 26 октябри соли равон қатъ мегардад.

Тавре дар шуъбаи иттилоотии дастгоҳи Раиси шаҳри Душанбе ба АМИТ «Ховар» иттилоъ доданд, қарори Раиси шаҳри Душанбе аз 5 октябри соли 2022 «Дар бораи муваққатан қатъ намудани оби нӯшокӣ» дар истгоҳи обтаъминкунии «Ҷанубӣ-Ғарбӣ» ба тасвиб расидааст.

Дар қарори мазкур омадааст, ки дар ҷараёни иҷрои корҳои нақшавӣ интиқоли оби нӯшокӣ дар ҳудуди ноҳияи Фирдавсӣ: шаҳракҳои 42, 43, 46, 62, 64 ва 65, маҳаллаҳои Сомон ва Равшангарон, кӯчаҳои Ҷомӣ, Борбад, Фирдавсӣ ва Н. Қарабоев (аз 34 то 86/3) муваққатан қатъ мегардад.

Инчунин дар ноҳияи Сино: маҳаллаҳои Меҳнатобод, Наврӯз, Роҳи нав, Арбобхотун, Чортеппа, шаҳракҳои 32, 33, 52, 53 ва 54, кӯчаҳои Нахимов, Мир, Юсуф, А. Қаҳҳорӣ, П. Сулаймоӣ, Тургенев, Р. Набиев, Ханжин, Гипрозем, Балъамӣ, Ҷомӣ, Борбад, Хуҷандӣ ва шаҳраки Севостопол интиқоли оби нӯшокӣ қатъ мешавад.

Аз шаҳрвандони муҳтарам эҳтиромона хоҳиш карда мешавад, ки дар ин рӯз миқдори зарурии обро захира намоянд.

АКС аз манбаъҳои боз