Сел дар чанд ноҳияи Тоҷикистон заминҳои наздиҳавлигиро зери об монда, роҳҳоро хароб кардааст

ДУШАНБЕ, 31.10.2022 /АМИТ «Ховар»/. Дар якчанд минтақаҳои Тоҷикистон сел омада, заминҳои наздиҳавлигӣ ва роҳҳо зери об монданд, хабар медиҳад Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикитон.

31 октябр, тахминан соати 13:10 селе, ки аз талу теппаҳои деҳаҳои Меҳробод ва Обшорони Ҷамоати деҳоти Чоряккорони ноҳияи Рӯдакӣ фаромад, заминҳои наздиҳавлигии сокинони маҳаллиро зери об монд. Таҳхонаҳои якчанд хонаи истиқоматӣ аз об пур шуда, роҳҳои маҳаллии миёни кӯчаҳои аҳолинишин қисман вайрон шуданд. Дар ҷойи ҳодиса комиссияи ҳолатҳои фавқулодаи ноҳияи Рӯдакӣ кор карда, барои бартарафсозии оқибатҳои офат техникаи махсус ҷалб шудааст. Талафоти ҷонӣ ва хисорот ба қайд гирифта нашудааст.

30 октябр, соати 12:30 бар асари бориши шадид дар километрҳои 94-95-уми шоҳроҳи байналмилалии Ваҳдат-Рашт-Лахш (дар наздикии мавзеи Кумак) роҳ дар ду ҷой зери об мондааст. Қитъаи роҳ баста шуд. Барои бартараф намудани оқибатҳои он техника ва кормандони хадамоти роҳи Вазорати нақлиёт ҷалб карда шуданд. Ҳоло роҳ тоза ва ҳаракати нақлиёт барқарор шудааст.

Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикитон ҳушдор медиҳад, ки дар мамлакат ҳавои номусоид ва бориши шадид боқӣ мемонад, ки метавонад боиси фаромадани сел гардад. Ғеҷидани гилу хок, баланд шудани сатҳи оби дарёҳо, обанборҳо, инчунин фурӯ рафтани хати соҳили дарёҳо ва кӯлҳо имконпазир аст. Бинобар бориши дарпешистода хатари фаромадани тарма, омадани сел ва сангрезӣ боқӣ мемонад. Обу ҳавои номусоид чаронидани чорво ва нигоҳубини онро дар чарогоҳҳои кӯҳӣ душвор мегардонад.

Ёдовар мешавем, ки дар сурати рух додани ҳолатҳои фавқулода ва ҳар гуна садама шаҳрвандон метавонанд ба навбатдори фаврии Кумита бо телефонҳои 112, 93 880 28 19, 221-91-19, 223-13-11 муроҷиат кунанд.

АКС: КҲФ ва МГ