Шараф Шерализода ва Игор Рунов ҳамкории минтақавии Тоҷикистонро дар соҳаи нақлиёт ва логистика баррасӣ намуданд

Октябрь 22, 2022 09:23

ДУШАНБЕ, 22.10.2022 /АМИТ «Ховар»/. 20 октябр муовини Вазири корҳои хориҷии Ҷумҳурии Тоҷикистон Шараф Шерализода котиби иҷроияи Маркази байналмилалии дипломатияи нақлиётӣ Игор Руновро, ки ҷиҳати иштирок дар маросими оғози лоиҳаи таҷрибавии «Ҳуҷҷати глобалии транзитӣ» ба Душанбе омадааст, ба ҳузур пазируфт. Дар ин бора ба АМИТ «Ховар» дар Вазорати корҳои хориҷии Ҷумҳурии Тоҷикистон хабар доданд.

Дар ҷараёни мулоқот масоили васеи ҳамкории минтақавии Тоҷикистон дар соҳаи нақлиёт ва логистика баррасӣ гардид.

Шараф Шерализода аз шурӯъ кардани татбиқи лоиҳаи зикршуда, ки ба афзоиши ҳамлу нақли мултимодалӣ тариқи шоҳроҳҳои Тоҷикистон такони ҷиддӣ мебахшад, изҳори қаноатмандӣ намуда, зарурати тавсеаи ҳамкории судманд миёни кишварҳо ва ташкилотҳои байналмилалии алоқаманд дар самти мазкурро таъкид кард.

Тавре АМИТ «Ховар» хабар дода буд, 8-19 октябр дар шаҳри Душанбе таҳти унвони «Логистика ва афзалияти он дар рушди робитаҳои нақлиётии Тоҷикистон бо давлатҳои минтақа» Конфронси байналмилалии илмӣ-амалӣ баргузор гардид, ки дар доираи он истифодаи Ҳуҷҷати глобалии транзитӣ (GTrD) аз истгоҳи Кӯлоби КВД «Роҳи оҳани Тоҷикистон» баррасӣ шуд. Тибқи ин санад нахустин қатораи боркашони транзитии Тоҷикистон аз масири Эрон ҷониби Туркия раҳсипор шуд.

Дар назар аст, ки тавассути долони мултимодалии Чин-Тоҷикистон-Туркманистон-Эрон-Туркия нахуст тавассути мошинҳо борҳо аз Ҷумҳурии Мардумии Чин ба шаҳри Кӯлоб, ки Минтақаи озоди иқтисодии Тоҷикистон ба шумор рафта, қарор аст қутби тиҷорат, транзит ва саноати Тоҷикистон гардад, оварда мешаванд. Баъдан борҳо аз ин ҷо ба Узбекистон-Туркманистон-Эрон ва Туркия интиқол меёбанд.

Дар конфронс намояндагони сохторҳои соҳаи нақлиёту роҳ аз кишварҳои хориҷии дуру наздик, инчунин мутахассисону коршиносони соҳаи роҳу нақлиёти ватанӣ иштирок намуданд.

Вазири нақлиёти Тоҷикистон Азим Иброҳим зикр намуд, ки имрӯзҳо рушди иқтисодиёти ҳар кишварро бе инкишофи логистика тасаввур кардан ғайри имкон аст. Зеро рушди системаҳои логистикӣ натиҷаи якчанд тамоюли ҷаҳонии рушди глобалӣ мебошад.

Дар конфронси байналмилалӣ масъалаҳои марбут ба танзими фаъолияти давлатии таъмини логистика — дастовардҳои илмӣ ва амалии фаъолияти он, таълим ва тарбияи мутахассисон оид ба таъминоти логистикӣ, рақамикунонии инфрасохтори логистика, мушкилоти ташкил ва рушди техникаи логистика, таҷрибаи пешрафти ширкатҳо ва марказҳои нақлиётию логистикӣ, саҳми бонувон дар логистика, воқеият, назар ба оянда ва имконияти захираи кадрии соҳа баррасӣ гардиданд.

Дар ҳошияи конфронс вохӯриҳои дуҷонибаи Вазири нақлиёт бо намояндагони Эрон, Узбекистон, Қазоқистон ва Туркманистон баргузор гардиданд. Зимни онҳо дурнамои ҳамкорӣ ва мушкилоти мавҷуда мавриди баррасӣ қарор гирифтанд.

Акс: ВКХ ҶТ

Октябрь 22, 2022 09:23

Хабарҳои дигари ин бахш

Дар Давҳа роҳҳои татбиқи Созишномаи ҳамкорӣ байни Тоҷикистон ва Қатар дар соҳаи фаъолияти хайриявӣ баррасӣ шуданд
Дар шаҳри Абузабӣ аз ташаббусҳои Президенти Тоҷикистон дар соҳаи обу иқлим ёдовар шуданд
Фиристодаи махсуси Португалия ба Тоҷикистон омад
Дар Истанбул масоили ҳамкорӣ ва мусоидат ба ҳалли мушкилоти шаҳрвандони Тоҷикистон дар қаламрави Туркия баррасӣ шуд
Дар Теҳрон иштироки фаъолонаи ҳайатҳои ду давлатро дар чорабиниҳо дар Тоҷикистон ва Эрон баррасӣ намуданд
Ҳамкории Тоҷикистон ва Озарбойҷон дар соҳаи саноат тақвият меёбад
Ҷавонони Тоҷикистон дар Фестивали VIII байналмилалии донишҷӯён «Як фазо барои ҳама» дар Москва иштирок намуданд
Сироҷиддин Муҳриддин бо намояндаи махсуси дабири кулли Созмони Милали Муттаҳид оид ба Осиёи Марказӣ мулоқот намуд
Намояндаи Тоҷикистон дар иҷлосияи 55-уми Шурои ҳуқуқи инсони Созмони Милали Муттаҳид иштирок намуд
Дар Душанбе рушди ҳамкории судманди Тоҷикистон ва Барномаи рушди Созмони Милали Муттаҳид баррасӣ гардид
Дар Тошканд татбиқи санадҳои баимзорасида байни Тоҷикистон ва Узбекистон баррасӣ гардид
Дар Теҳрон ҷаласаи Гурӯҳи кории махсус оид ба мусоидат ба сармоягузории давлатҳои аъзои Созмони ҳамкории Шанхай доир гардид