Дар Брюссел, Қоҳира ва Ашқобод ҷашнҳои миллӣ ва давлатии Тоҷикистонро таҷлил намуданд

Ноябрь 28, 2022 14:20

ДУШАНБЕ, 28.11.2022 /АМИТ «Ховар»/. Ба ифтихори 30-юмин солгарди Иҷлосияи XVI Шӯрои Олӣ, Рӯзи Президенти Ҷумҳурии Тоҷикистон ва Рӯзи Парчами давлати Тоҷикистон бо ширкати фаъоли ҳамватанони муқими кишварҳои Белгия, Миср ва Туркманистон 25-27 ноябр ҳамоишҳои бошукӯҳи ҷашнӣ баргузор гардиданд. Дар ин бора ба АМИТ «Ховар» дар Вазорати корҳои хориҷии Ҷумҳурии Тоҷикистон хабар доданд. 

27 ноябр дар шаҳри Брюссел бо ташаббуси Сафорати Тоҷикистон дар Белгия бо ширкати фаъоли ҳамватанони муқими кишварҳои Бенилюкс ҳамоиши ҷашнӣ баргузор гардид. Дар он аҳамияти таърихии иҷлосияи зикршудаи Шӯрои Олии кишвар ва нақши созандаву барозандаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар рушду нумуи Тоҷикистони навин бо намунаву мисолҳои сершумор таъкид гардид. Зарурати саҳмгузории ҳамагонӣ дар татбиқу амалӣ гардонидани нақшаҳои эҳёкунандаи ӯ чун вазифаи пурифтихори миллӣ ҳам дар дохили кишвар ва ҳам дар равобити хориҷии он бо ҷомеаи байналмилалӣ дар маркази таваҷҷуҳи ҳозирин қарор гирифт.

Ҳамоишро лаҳзаҳои мусиқии рангину зебои оҳангсози ҷавон, донишҷӯи Консерваторияи Подшоҳии Белгия Ҷаннат Ҳусейнзода зеб доданд.

Инчунин 27 ноябр дар шаҳри Қоҳира бо ҳузури ҳамватанони муқими Миср бахшада ба ин санаҳои муҳим ҷамъомади идона баргузор гардид.

Сафири Ҷумҳурии Тоҷикистон Заробиддин Қосимӣ аз шебу фарози таърихи муосири давлати ҷавони Тоҷикистон, нақши боризи Иҷлосияи таърихии XVI Шӯрои Олӣ ва ҷонбозиҳои Пешвои миллат муҳтарам Эмомалӣ Раҳмон дар роҳи расидан ба сулҳу созиш ва наҷоти Ватан аз вартаи нобудӣ, дастовардҳои шоёни таҳсин дар роҳи таҳкими давлату давлатдории миллӣ ёдовар шуда, ҳозиринро ба қадрдонӣ аз ин дастовардҳо ва саҳмгузорӣ дар муаррифии давлату миллат дар арсаи ҷаҳонӣ даъват намуд.

Зимни ҷамъомад ба ҳозирин ҳамчунин филми мустанади таърихӣ намоиш дода шуд.

Сафири Фавқулода ва Мухтори Ҷумҳурии Тоҷикистон дар Туркманистон Фаррух Шарифзода 25 ноябр дар суханронии худ ба муносибати 30-юмин солгарди Иҷлосияи XVI Шӯрои Олии Ҷумҳурии Тоҷикистон, Рӯзи Президенти Ҷумҳурии Тоҷикистон ва 30-солагии Парчами давлатии Ҷумҳурии Тоҷикистон аҳамияти таърихии Иҷлосияи XVI Шӯрои Олии Ҷумҳурии Тоҷикистон, саҳми арзандаи Президенти Ҷумҳурии Тоҷикистон муҳтарам Эмомалӣ Раҳмонро дар ташаккули асосҳои ҳуқуқии давлат дар давраи соҳибистиқлолии Ҷумҳурии Тоҷикистон, инчунин якчанд ташаббусҳои байналмилалии кишвар, аз ҷумла натиҷаҳо ва аҳамияти «Раванди оби Душанбе» ва ҷараёни омодасозии Конфронси оби СММ, ки моҳи марти соли 2023 дар Ню-Йорк баргузор мешавад, таъкид намуд.

Барномаи рангини консертӣ бо мусиқии мардумӣ ва рақсҳои устодони санъати Тоҷикистон сурат гирифт. Ҳамчунин намоишгоҳи васеъ ташкил карда шуд, ки он имконияти хубро ба тамошобинон барои саёҳати таърихию фарҳангӣ ба Тоҷикистони офтобӣ фароҳам оварда, бо гуногунии анъанаҳои кишвар, ҳунарҳои мардумӣ, осори муосири санъат, либосҳои миллӣ ва таомҳои нотакрори тоҷик шинос гардонид.

Дар чорабинӣ муовини Раиси Девони вазирони Туркманистон Хоҷамурад Гелдимуродов, Вазири фарҳанги Ҷумҳурии Тоҷикистон Зулфия Давлатзода, намояндагони доираи санъату ҳунари Ҷумҳурии Тоҷикистон, намояндагони вазорату идораҳои Туркманистон, намояндагони корпуси дипломатии муқими Туркманистон, намояндагони васоити ахбори омма, инчунин ҳамватанони муқими Ашқобод ширкат варзиданд.

Акс: ВКХ ҶТ

Ноябрь 28, 2022 14:20

Хабарҳои дигари ин бахш

Дар Тошканд татбиқи санадҳои баимзорасида байни Тоҷикистон ва Узбекистон баррасӣ гардид
Дар Теҳрон ҷаласаи Гурӯҳи кории махсус оид ба мусоидат ба сармоягузории давлатҳои аъзои Созмони ҳамкории Шанхай доир гардид
Дар Минск вохӯрии раисони комиссияҳои марказии интихоботи Тоҷикистон ва Беларус доир шуд
Дар Сеул «Харитаи роҳ»-и амалишавии Низоми иҷозати шуғл барои Тоҷикистон баррасӣ гардид
Дурнамои муносибатҳои Тоҷикистон ва Арабистони Саудӣ баррасӣ шуд
Тоҷикистон ҳамкориро бо музофоти федеролии Бранденбурги Олмон фаъол менамояд
Масъалаи барқарор намудани парвозҳои ҳавоӣ дар масири Боку-Душанбе-Боку баррасӣ гардид
Директори Агентии миллии иттилоотии Тоҷикистон «Ховар» бо Сафири Озарбойҷон мулоқот намуд
Дар Донишгоҳи молиявии Русия зиёда аз 200 донишҷӯи тоҷик таҳсил менамояд
Дар Душанбе дурнамои густариши ҳамкорӣ байни Тоҷикистон ва Фаронса баррасӣ гардид
Баргузории ҷаласаи навбатии Комиссияи байниҳукуматии Тоҷикистон ва Туркия баррасӣ гардид
Соли 2024 байни Ҷумҳурии Тоҷикистон ва Давлати Қатар 9 санади нави ҳамкорӣ ба имзо расид