Дар Тоҷикистон хатари омадани сел ва резиши санг боқӣ мемонад

ДУШАНБЕ, 04.11.2022 /АМИТ «Ховар»/. Тавре қаблан иттилоъ додем, 4-5 ноябр дар қаламрави ноҳияҳои тобеи ҷумҳурӣ, навоҳии кӯҳиву наздикӯҳии вилояти Хатлон ва ноҳияи Дарвози ВМКБ боронҳои пуршиддат дар назар дошта шудаанд, ки дар баъзе ҳолатҳо ба барфи тар табдил меёбанд.

Тавре ба АМИТ «Ховар» дар Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон хабар доданд, дар ин рӯзҳо боронҳои шадид метавонанд сабаби омадани селҳо, резиши санг дар ноҳияҳои кӯҳиву наздикӯҳии вилоятҳои Хатлон, Суғд, ноҳияҳои тобеи ҷумҳурӣ, ҳамчунин қаламрави ноҳияи Дарвози ВМКБ шаванд. Ҳамчунин эҳтимоли баланд шудани сатҳи оби рӯдхонаҳои Ёхсу, Қизилсу ва дарёҳое, ки дар қисмати ҷанубии қаторкӯҳҳои Ҳисор ҷорӣ мешаванд, дар назар аст.

Кумитаи ҳолатҳои фавқулода ва мудофиаи гражданӣ ҳушдор медиҳад, ки шаҳрвандон дар ин рӯзҳо бояд аз сафар бо роҳҳои кӯҳӣ, рафтан ба саҳрову доманакӯҳҳо барои чорвочаронӣ, ҷамъоварии ҳезум, анҷоми корҳои кишоварзӣ, шикор, моҳидорӣ худдорӣ кунанд.

Ҳамчунин ронандагон ҳангоми ҳаракат дар роҳҳои кӯҳӣ бояд қоидаҳои бехатариро ҷиддан риоя намоянд.

Кумита ҳамчунин аз аҳолӣ хоҳиш мекунад, ки барои пешгирӣ аз вуруди сел ба ҳавливу киштзорҳо сари вақт селроҳаҳо ва ҷӯйборҳоро аз ҳар гуна хасу партовҳо тоза созанд.

АКС: Кумитаи ҳолатҳои фавқулода ва мудофиаи гражданӣ