Донишҷӯёни забондони Донишгоҳи давлатии омӯзгорӣ аз пардохти 10-20 фоизи маблағи шартномаи таҳсил озод мешаванд

ДУШАНБЕ, 05.11.2022. /АМИТ «Ховар»/. Раёсати Донишгоҳи давлатии омӯзгории Тоҷикистон ба номи Садриддин Айнӣ тасмим гирифтааст, ки ба ифтихори 30-юмин солгарди Иҷлосияи 16-уми Шӯрои Олии Ҷумҳурии Тоҷикистон ва Рӯзи Президент донишҷӯёнеро, ки аз 4 то 15 ноябр 400 вожаи пешниҳодшудаи забонҳои русӣ ва англисиро ба иловаи 2 ғазал аз осори шоирони классику муосири тоҷик аз бар менамоянд, аз пардохти 10-20%-и маблағи шартномаи таҳсил озод намояд. Дар ин бора ба АМИТ «Ховар» котиби матбуоти донишгоҳ Ҳабибулло Сатторӣ хабар дод.

Бо пешниҳоди Ректори донишгоҳ Аҳлиддин Ибодуллозода донишҷӯёне, ки то имрӯз маблағи шартномаи таҳсилро пурра пардохт намудаанд, дар сурати аз бар намудани 400 вожаи пешниҳодшуда Донишгоҳ ба онҳо 10-20%-и маблағи шартномаи таҳсилашонро бар мегардонад. Донишҷӯёни дар доираи ихтисосҳои забони англисӣ таҳсилкунанда бинобар соҳибтахассус будан аз ин имтиёзи пешниҳодшуда истисно мебошанд.

Инчунин донишҷӯёне, ки рейтингҳои 1-ум ва 2-юми давраҳои таҳсилро бо баҳои аъло ҷамъбаст менамоянд ва дар озмунҳои ҷумҳуриявӣ фаъолона ширкат меварзанд, аз пардохти ҳаққи шартномаи таҳсил то сессияи навбатӣ озод мегарданд.

Ёдовар мешавем, ки бо фармоиши Вазири маориф ва илми Ҷумҳурии Тоҷикистон Раҳим Саидзода аз 13 сентябри соли 2022  омӯзиш ва аз ёд кардани 400 вожаи серистеъмоли забонҳои тоҷикӣ, русӣ, англисӣ барои омӯзгорону хонандагони муассисаҳои таҳсилоти миёнаи умумӣ (синфҳои 5-11), устодону донишҷӯёни муассисаҳои таҳсилоти ибтидоӣ, миёна, олии касбӣ ва кормандони соҳаи маориф ва илм ҳатмӣ дониста шудааст.

АКС: АМИТ «Ховар»/Донишгоҳи давлатии омӯзгории Тоҷикистон