Конститутсияи Тоҷикистон сулҳу суботи сиёсӣ ва ваҳдати миллиро таҳким бахшид

ДУШАНБЕ, 05.11.2022. /АМИТ «Ховар»/. Дар бонки саноативу содиротии Тоҷикистон «Саноатсодиротбонк» ба муносибати Рӯзи Конститутсия таҳти унвони «Конститутсия — муқаддасоти миллӣ ва бахтномаи шаҳрвандони Тоҷикистон» ҷамъомади тантанавӣ баргузор гардид. Дар ин бора ба АМИТ «Ховар» дар бонки мазкур хабар доданд.

Дар ҷаласа Раиси Раёсати бонки саноативу содиротии Тоҷикистон, Ҳокимшоҳ Бобозода, Раиси Кумитаи сохтори давлатӣ ва худидоракунии маҳаллии Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода ва роҳбарону кормандони воҳидҳои сохтории Бонк иштирок намуданд.

Ҳокимшоҳ Бобозода оид ба нақши Конститутсияи Ҷумҳурии Тоҷикистон дар таҳкими Истиқлолияти давлатӣ, оғози дигаргуниҳои тоза дар самти бунёди давлати мустақил ибрози назар намуд.

«Бо шарофат ва риояи меъёрҳои Конститутсия пояи давлату Ҳукумат ва ҷомеа таҳким ёфта, сулҳу оромӣ, суботи сиёсӣ ва ваҳдати миллӣ барқарор гардида, рушди устувори сиёсӣ ва иқтисодии Тоҷикистон таъмин гашт. Имрўз барои ҳар як шаҳрванди кишвар шароити зиндагии арзанда ва инкишофи озодона фароҳам омадааст, ки ин ҳама ба ин санади сарнавиштсоз алоқамандӣ дорад»,-илова кард Ҳокимшоҳ Бобозода.

Дар идома Раиси Кумитаи сохтори давлатӣ ва худидоракунии маҳаллии Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода вобаста ба моҳияти асосӣ ва дарки Конститутсияи Ҷумҳурии Тоҷикистон аз ҷониби шаҳрвандон ва эътироф шудани ин бахтномаи миллат миёни даҳгонаи беҳтарини Конститутсияҳои дунё ибрози андеша намуд.

Номбурда зикр кард, ки ин ҳама созандагию ободкорӣ ва суботи сиёси кишвар аз талошу заҳматҳои пайвастаи Пешвои муаззами миллат маншаъ гирифта, ҷаҳониён имрӯз ин санади муқаддаси моро ва таҷрибаи комили миллати тоҷикро дар самтҳои мухталиф истифода мебаранд.

Дар охир иштирокчиёни ҳамоиш вобаста ба Конститутсияи Ҷумҳурии Тоҷикистон ва санадҳои меъёрии ҳуқуқии дар самти фаъолияти корӣ мубодилаи афкор намуданд.

АКС: «Саноатсодиротбонк»