Мусобиқаи варзишӣ оид ба волейбол миёни дастаҳои бонувони вазорату идораҳо ҷамъбаст шуд

ДУШАНБЕ, 05.11.2022. /АМИТ «Ховар»/. Ғолибони мусобиқаи варзишӣ оид ба волейбол (бонувон), ки миёни вазорату идораҳо ва ташкилоту муассисаҳои мамлакат баргузор шуд, муайян гардиданд. Ҷойи якумро дастаи  Вазорати корҳои дохилии Ҷумҳурии Тоҷикистон, зинаи  дуюмро  Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ва мақоми  сеюмро  Кумитаи кор бо ҷавонон ва варзиши назди Ҳукумати Ҷумҳурии Тоҷикистон соҳиб гаштанд. Дар ин бора ба АМИТ «Ховар» муовини сардори Раёсати тарбияи ҷисмонӣ ва инкишофи варзиши дастгоҳи марказии Кумитаи кор бо ҷавонон ва варзиш Муҳаммадтолиб Шокирзода хабар дод.

Мусобиқа бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо вазорату идораҳо ва ташкилоту муассисаҳои ҷумҳуриявию шаҳрӣ бахшида ба Рӯзи Конститутсияи Ҷумҳурии Тоҷикистон ва 30 – солагии Иҷлосияи ХVI Шӯрои Олии Ҷумҳурии Тоҷикистон ташкил ва роҳандозӣ гардид.

Дар он 17 даста аз вазорату идораҳо ва ташкилоту муассисаҳои ҷумҳуриявию шаҳрӣ иштирок карда, миёни ҳам рақобат намуданд.

Ғолибону ҷоизадорони чорабинӣ аз ҷониби раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Абдулло Раҳмонзода бо ҷом, диплом, медал ва мукофотҳои пулӣ дар ҳаҷми 12 ҳазор сомонӣ қадрдонӣ шуданд.

Барои ғолиби ҷойҳои якум — 6 ҳазор сомонӣ,  дуюм -4 ҳазор сомонӣ ва  сеюм — 2 ҳазор сомонӣ муқаррар гардида буд, ки маблағҳои мазкур  дар вазъияти тантанавӣ супорида шуданд.

Инчунин миёни кормондони вазорату идораҳо ва ташкилоту муассисаҳои ҷумҳуриявию шаҳрӣ баргузории мусобиқаҳои варзишӣ аз рӯи намуди футболи хурд, шашкаву шоҳмот ва тенниси рӯи миз идома дошта, дар арафаи таҷлили 30 – солагии Иҷлосияи ХVI Шӯрои Олии Ҷумҳурии Тоҷикистон, Рӯзи Президенти Ҷумҳурии Тоҷикистон ва Рӯзи Парчами давлатии Ҷумҳурии Тоҷикистон дар вазъияти тантанавӣ ҷамъбаст ва ғолибон қадршиносӣ мегарданд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон