Соҳибкорони Самара бо ҳадафи тиҷоратӣ ба Тоҷикистон омаданд

ДУШАНБЕ, 18.11.2022 /АМИТ «Ховар»/. Намояндагони шаш корхонаи вилояти Самара рӯзи панҷшанбе, 17 ноябр ба Душанбе омаданд. Дар ин бора ТАСС бо истинод ба Намояндагии савдои Россия дар Тоҷикистон хабар дод.

«Зимни сафари тиҷоратӣ соҳибкорони Самара аз якчанд корхонаҳои шаҳри Душанбе дидан карда, бо намояндагони вазоратҳои кишоварзӣ, рушди иқтисод ва савдо, тандурустӣ ва ҳифзи иҷтимоии аҳолӣ вохӯриҳои корӣ баргузор мекунанд», — гуфта шудааст дар хабари ТАСС.

Ба ин ҳайат намояндагони шаш корхонаи вилояти Самара, ки ба истеҳсоли орд, моддаҳои фаъоли сатҳӣ, стерилизаторҳо, нармафзор, мошинҳо барои бахши кишоварзӣ, маҳсулоти қаннодӣ, лавозимоти тиббӣ ва ғайра машғуланд, шомил мебошанд.

Ба иттилои намояндаи савдо, дар муносибатҳои тиҷоративу иқтисодӣ бо Тоҷикистон 67 ширкати Россия иштирок доранд. Дар нуҳ моҳи соли 2022 ҳаҷми муомилоти тиҷоратии вилояти Самара, ки миёни минтақаҳои Россия дар ҳамкорӣ бо Тоҷикистон мақоми ҳаштумро ишғол мекунад, 11,6 миллион долларро ташкил додааст.

АКС аз бойгонӣ