ЧҶ-2022: «Бразилия» ва «Хорватия» бар ҳарифонашон ғолиб омаданд ва дар даври ¼-финал бо ҳам вомехӯранд

ДУШАНБЕ, 06.12.2022 /АМИТ «Ховар»/. Дастаҳои мунтахаби Хорватия ва Бразилия, ки шаби 5 декабр дар бозиҳои даври 1/8-ниҳоии Ҷоми ҷаҳонии футбол-2022 дар Қатар рақибонашонро мағлуб карданд, ба чорякфинали мусобиқот роҳ ёфтанд. Дар ин бора шореҳи варзиш Бобо Холмурозода ба хабарнигори  АМИТ «Ховар»  Меҳрони  Қурбон хабар дод.

Дастаҳои мунтахаби Ҷопон ва Хорватия бозии пуршиддат анҷом дода, ба нахустин замони изофа дар ин Ҷоми ҷаҳонии футбол расиданд. Аммо дар онҷо ҳам ғолиб муайян нашуд ва ҳисоби мусовии 1:1 тағйир наёфт. Бинобар ин силсилаи пеналтӣ ё ҷаримаи ёздаҳметра  таъйин гардид. Маълум шуд, ки  маҳорати дастаи мунтахаби   Хорватия дар задани тӯб аз ҷаримаи 11-метрӣ хубтар аст, аз ин рӯ онҳо бо ҳисоби 3:1 ғолиб омада, пеш рафтанд.

Боз як дастаи қораи Осиё – Кореяи Ҷанубӣ бо  дастаи  мунтахаби Бразилия вохӯрд. Ин даста низ аз ҳаққи идомаи мубориза дар чорякфинал маҳрум шуд. Дастаи мунтахаби Бразилия  дар нимаи аввал ҳарифро голборон карда, пас аз танаффус ором шуд.

Дастаи мунтахаби Кореяи Ҷанубӣ ба чаҳор голи бразилиягиҳо тавонист танҳо бо як гол посух бидиҳад. Ин шикасти харобиовар роҳи дастаи мунтахаби Кореяро ба даври чорякниҳоӣ баст. Зимнан, дастаи мунтахаби Кореяи Ҷанубӣ охирин дастае аз қораи Осиё буд, ки аз ҳаққи ширкат дар чорякфинали мусобиқот маҳрум шуд.

Дастаи мунтахаби Хорватия бо дастаи мунтахаби  Бразилия дар чорякфинали мусобиқот 9  декабр бозӣ мекунад.

Ёдовар мешавем, ки дар рӯзи аввали плей-офф – 3  декабр ба даври баъдӣ дастаҳои мунтахаби Нидерланд ва Аргентина, ки аввалин ҷуфти чорякфиналиро ташкил доданд, роҳхат гирифтанд. Дар даври чорякниҳоӣ  дастаҳои мунтахаби Нидерланд бо Аргентина 9  декабр ва Фаронса бо Англия 10  декабр миёни ҳам  бозӣ хоҳанд кард.

Мавриди зикр аст, ки шаби 6  декабри соли 2022  дар Ҷоми ҷаҳонии футбол дар Қатар  дастаи мунтахаби Португалия дар даври 1/8 финал бо тими мунтахаби Швейтсария бозӣ мекунад. Вохӯрии дастаҳо дар варзишгоҳи «Лусаил» доир мегардад. Телевизиони «Варзиш»  ин рақобатро соати 23:45 ба таври мустақим намоиш медиҳад. Қобили зикр аст, ки  дастаи мунтахаби Португалия бо 6 имтиёз дар гурӯҳи «H» бар дастаҳои мунтахаби  Гана (3:2) ва Уругвай (2:0)  пирӯз шуд ва аз Кореяи Ҷанубӣ (1:2) шикаст хӯрд. Дастаи мунтахаби Швейтсария дар гурӯҳи «G»  аз  дастаҳои мунтахаби Бразилия (0:1) шикаст хӯрда, бар Камерун (1:0) ва Сербия (3:2) пирӯзӣ ба даст овард ва  дар ҷойи дуюм ба плей-офф роҳ ёфт.

АКС аз манбаъҳои боз