ЧҶ-2022: Фаронса – Марокаш. Кай ва дар куҷо бозии дуюми нимфиналро тамошо кардан мумкин аст?

ДУШАНБЕ, 14.12.2022 /АМИТ «Ховар»/. Шаби 14 ба 15 декабр дар шаҳри Эл-Хора бозии дуюми нимфиналии Чемпионати ҷаҳон-2022 оид ба футбол баргузор мегардад, ки дар он дастаҳои мунтахаби Фаронса ва Марокаш бозӣ мекунанд, хабар медиҳад мухбири АМИТ «Ховар».

Пахши мустақими бозии Фаронса ва Марокаш соати 23:59 ба вақти Душанбе оғоз шуда, дар шабакаҳои варзишии Тоҷикистон — «ТВ Варзиш» ва «Футбол» дастрас хоҳад шуд.

Ёдовар мешавем, ки дастаи мунтахаби Фаронса пас аз пирӯзӣ дар ЧҶ-2018 дар Россия чемпиони фаълии ҷаҳон оид ба футбол мебошад. Дар марҳилаи 1/8-финали ЧҶ-2022 дастаи Фаронса нахуст бар дастаи мунтахаби Лаҳистон (3:1) ва баъдан бар дастаи Англия (2:1) пирӯз шуд. Дар омади гап, ҳамлагари ПСЖ ва дастаи мунтахаби миллии Фаронса Килиан Мбаппе (ДАР АКС) ба роҳ ёфтани дастааш ба даври нимфинали чемпионати ҷаҳон дар Қатар вокуниш кард. «Ба орзуи мутлақ боз ҳам наздиктар шудем», — навиштааст ӯ дар шабакаҳои иҷтимоӣ.

Дар мавриди дастаи мунтахаби миллии Марокаш бояд гуфт, ки ду бозии ҳангомавӣ нишон дод: аввал дастаи мунтахаби миллии Испанияро аз мусобиқа берун кард (0:0, зарбаҳои 11-метра — 3:0), пас аз он дастаи мунтахаби миллии Португалияро ноком намуд (1:0).

АКС аз манбаъҳои боз