Дар Душанбе Стратегияи амнияти иқтисодии Тоҷикистон баррасӣ гардид

ДУШАНБЕ, 10.12.2022 /АМИТ «Ховар»/. 9 декабр дар Маркази тадқиқоти стратегии назди Президенти Ҷумҳурии Тоҷикистон дар мавзӯи «Стратегияи амнияти иқтисодии Ҷумҳурии Тоҷикистон: нишонаҳои нави рушд» ҳамоиши илмию амалӣ баргузор гардид. Дар ин бора ба АМИТ «Ховар» дар Маркази мазкур хабар доданд.

Дар ҳамоиш роҳбари дастгоҳи Маркази тадқиқоти стратегии назди Президенти Ҷумҳурии Тоҷикистон Умед Давлатов гуфт, ки рушди устувори иҷтимоию иқтисодӣ, баланд шудани сатҳи некуаҳволии аҳолӣ, татбиқи муваффақонаи барномаҳои давлатӣ, таҳкими қонуният ва тартибот, ноил шудан ба ҳадафҳои стратегии ҷумҳурӣ дар соҳаи истиқлолияти энергетикӣ, амнияти озуқаворӣ, баромадани кишвар аз бунбасти коммуникатсионӣ ва индустрикунонии кишвар ба ҳалли муассири мушкилоти бамиёномада вобаста аст.

«Амнияти иқтисодӣ чун бахши муҳими амнияти миллии Ҷумҳурии Тоҷикистон шароит ва кафолати рушди устувори иқтисодӣ дар доираи татбиқи «Стратегияи миллии рушди Ҷумҳурии Тоҷикистон барои давраи то 2030» ба ҳисоб меравад. Ҳукумати Ҷумҳурии Тоҷикистон дар ҷустуҷӯи система ва рушди устувори иқтисодиёти кишвар, беҳтар кардани системаи идоракунии давлатӣ, беҳтар намудани фазои сармоягузорӣ ва дастгирии соҳибкорӣ мебошад, ки ҳамаи чорабиниҳо, дар маҷмӯъ, ба баланд бардоштани сатҳ ва сифати зиндагӣ равона карда шудаанд»,-зикр намуд У. Давлатов .

Таъкид гардид, ки бо мақсади кам кардани таъсири таҳдидҳо ба амнияти иқтисодӣ то соли 2030 Тоҷикистон дар назди худ мақсад гузоштааст, ки ММД-ро ба ҳар сари аҳолӣ се маротиба афзоиш дода, камбизоатиро беш аз 2 маротиба кам намояд ва ҳиссаи аҳолиро бо даромади миёна аз 22 то 50% афзоиш диҳад. Дар натиҷаи беҳтар шудани фазои сармоягузорӣ ҳиссаи сармояи хусусӣ дар ММД бояд 5 маротиба афзоиш ёбад ва саҳми бахши саноат ба маҷмӯи маҳсулоти дохилӣ ба таври назаррас афзоиш ёбад. Ин имкон медиҳад, ки Тоҷикистон ба кишвари индустриалӣ-аграрӣ табдил ёбад.

АКС: Хадамоти матбуоти Маркази тадқиқоти стратегӣ