Дар Маҷлиси намояндагон ба Кодекси андози Ҷумҳурии Тоҷикистон тағйиру иловаҳо ворид карда шуданд

Декабрь 7, 2022 12:05

ДУШАНБЕ, 07.12.2022 /АМИТ «Ховар»/. Номукаммалии хизматрасонӣ дар хатсайрҳои ҳавоии мавҷуда, кам будани шумораи ҳавопаймоҳо, гарон будани арзиши чиптаҳои ҳавопаймо ба рушди сайёҳӣ таъсири манфӣ расонида истодааст. Қабули лоиҳаи қонуни мазкур барои баланд бардоштани устувории хатсайрҳои ҳавопаймоӣ, идоракунии беҳтари паркҳои ҳавопаймоӣ, зиёд намудани интихоби хатсайрҳои ҳавопаймоӣ аз ҷониби мусофирон, инчунин кам намудани арзиши хизматрасониҳои ҳавопаймоӣ ва чиптаҳои ҳавопаймоӣ ва аз байн бурдани ихтилофи назар дар татбиқи муқаррароти Кодекси андоз мусоидат менамояд. Дар ин хусус, имрӯз дар  ҷаласаи навбатии иҷлосияи чоруми Маҷлиси намояндагони Маҷлиси Олии Ҷумҳурии Тоҷикистон, даъвати шашум, ки  таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода баргузор гардид, гуфта шуд.

Тавре  котиби матбуоти Маҷлиси намояндагон Муҳаммадато Султонов  ба АМИТ «Ховар» хабар дод, дар иҷлосия вакилон лоиҳаи Қонуни Ҷумҳурии Тоҷикистон «Дар бораи ворид намудани тағйиру иловаҳо ба Кодекси андози Ҷумҳурии Тоҷикистон»- ро мавриди баррасӣ қарор доданд.

Масъалаи мазкурро ба вакилони мардумӣ раиси кумитаи Маҷлиси намояндагон оид ба иқтисод ва молия Маҳмадалӣ Қурбонзода ва Вазири молияи Ҷумҳурии Тоҷикистон Файзиддин Қаҳҳорзода муаррифӣ намуда, изҳор доштанд, ки бо назардошти вазъи ҷуғрофӣ ва аз марказҳои ҷаҳонӣ дур будани Ҷумҳурии Тоҷикистон, ҳамлу нақли ҳавопаймоӣ, пеш аз ҳама, ҳамлу нақли ҳавопаймоии байналмилалӣ дар рушди иҷтимоиву иқтисодӣ нақши муҳим дошта, ин масъала ва роҳҳои рушди нақлиёти ҳавоӣ дар Стратегия ва барномаҳои давлатӣ мушаххас пешбинӣ шудаанд.

Дар Стратегияи миллии рушди Ҷумҳурии Тоҷикистон барои давраи то соли 2030 рушди соҳаи нақлиёт, ки ба ташкили ҷойҳои нави корӣ, баланд бардоштани самаранокии бахшҳои иқтисодиёти миллӣ ва беҳсозии сифати зиндагии аҳолӣ равона шудааст, инчунин нигаҳдорӣ ва инкишофи шабакаи фурудгоҳҳои маҳаллӣ, авиатсияи хурду миёна ҷиҳати таъмини дастрасии аҳолии ҳамаи минтақаҳо ба нақлиёти ҳавоӣ ҳамчун ҳадафҳои он пешбинӣ шудааст.
Бо дарназардошти ин бахши нақлиёт, аз ҷумла нақлиёти ҳавоӣ қисми зиёди хароҷоти сайёҳиро ташкил менамояд.
Ҳамзамон дар лоиҳа бо мақсади мутобиқ намудани муқаррароти Кодекси андоз бо дигар санадҳои меъёрии ҳуқуқӣ вобаста ба муайян намудани ҳадди ақалли иҷорапулии молу мулк ба қисми 12 моддаи 21 Кодекси андоз тағйирот пешбинӣ шудааст.

Лоиҳаи қонуни мазкур ба моддаи 60-и Конститутсияи Ҷумҳурии Тоҷикистон ва талаботи қонунгузории Ҷумҳурии Тоҷикистон мутобиқ мебошад.

Дар иҷлосия ҳамчунин раиси кумитаи Маҷлиси намояндагон оид ба қонунгузорӣ ва ҳуқуқи инсон Равшан Раҷабзода лоиҳаи Қонуни Ҷумҳурии Тоҷикистон «Дар бораи масунияти юрисдиксионии давлати хориҷӣ ва моликияти он дар Ҷумҳурии Тоҷикистон»-ро баррасӣ намуда, иброз намуд, ки мақсади асосии лоиҳаи Қонуни Ҷумҳурии Тоҷикистон «Дар бораи масунияти юрисдиксионии давлати хориҷӣ ва моликияти он дар Ҷумҳурии Тоҷикистон»- ин ҳифзи ҳуқуқҳои шахсони воқеӣ ва ҳуқуқии ҷумҳурӣ мебошад, ки дар муносибатҳои маданӣ, иқтисодӣ ё тиҷоратӣ бо давлатҳои хориҷӣ иштирок менамоянд.

Дар интиҳо аз рӯи масъалаҳои баррасишуда қарорҳои дахлдор  қабул карда шуданд.

Акс: МН МО ҶТ

 

Декабрь 7, 2022 12:05

Хабарҳои дигари ин бахш

Вакилони Маҷлиси намояндагон бо сокинони шаҳри Бохтар вохӯрӣ намуданд
Вакилони Маҷлиси намояндагон бо кормандону табибони шаҳри Хуҷанд мулоқот намуданд
Вакилони палатаи поёнии Парлумони Тоҷикистон дар шаҳру ноҳияҳо бо интихобкунандагон вохӯрӣ менамоянд
Истиқлолияти давлатӣ ва рушди парламентаризми миллӣ
Файзалӣ Идизода дар ноҳияи Сангвор бо интихобкунандагон вохӯрӣ намуд
Файзалӣ Идизода дар ноҳияи Лахш бо интихобкунандагон вохӯрӣ намуд
Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ бо Раиси Маҷлиси Парламенти Ҷумҳурии Қазоқистон Ерлан Кошанов мулоқот намуданд
Рустами Эмомалӣ дар шаҳри Остона бо фаъолияти технопарки байналмилалии Астана Хаб шинос шуданд
Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ бо Президенти Ҷумҳурии Қазоқистон Қосим-Жомарт Токаев мулоқот намуданд
Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ бо Раиси Сенати Парламенти Ҷумҳурии Қазоқистон Маулен Ашимбаев мулоқот намуданд
Рустами Эмомалӣ дар пояи маҷмааи «Муҳофизони Ватан»дар Остона гулчанбар гузоштанд
Сафари расмии Раиси Маҷлиси миллии Маҷлиси Олии Ҷумҳурии Тоҷикистон Рустами Эмомалӣ дар Қазоқистон оғоз шуд