«ФУРӮҒИ СУБҲИ ДОНОӢ КИТОБ АСТ». Дар озмуни ҷумҳуриявӣ намояндагони касбу кори гуногун миёни ҳам рақобат доранд

Декабрь 13, 2022 16:06

ДУШАНБЕ, 13.12.2022. /АМИТ «Ховар»/. Дар шаҳри Душанбе даври ниҳоии Озмуни ҷумҳуриявии «Фурӯғи субҳи доноӣ китоб аст» ҷараён дорад. Тибқи ҷадвали тасдиқшуда, аз имрӯз то 15 декабр 130 нафар омӯзгорони ҳамаи зинаҳои таҳсилот, ходимони илмию адабии муассисаҳои илмиву эҷодӣ, фарҳангу санъат, калонсолон ва намояндагони касбу кори гуногун миёни ҳам рақобат менамоянд, иттилоъ медиҳад мухбири АМИТ «Ховар».

Тавре қаблан иттилоъ додем, озмуни мазкур 5 декабр оғоз гардида, аз рӯйи 5 номина – адабиёти кӯдакону наврасон ва осори шифоҳӣ, адабиёти классикии тоҷик, адабиёти муосири тоҷик, адабиёти ҷаҳон ва эҷоди назму наср сурат мегирад.

Баҳри дарёфти ғолибон довталабон тамоми сайъу талошҳои худро ба харҷ дода, мунтазири натиҷаҳои онанд.

Омӯзгори МТМУ рақами 25-и шаҳри Ваҳдат Гавҳар Сайфиддинова дар озмуни мазкур аз рӯи номинаи «Адабиёти ҷаҳон» иштирок дорад. Ӯ иброз медорад, ки тавассути иштирок дар озмун ҷаҳонбинии худро хеле васеъ намудааст.

«Дар асарҳое, ки ба озмун пешниҳод гардидаанд, доир ба таъриху фарҳанги халқи тоҷик ва халқҳои ҷаҳон маълумоти мухтасар оварда шудааст. Мутолиаи онҳо барои ҳар шахс дар зиндагӣ зарур аст, зеро он ба инсон ба ғайр аз огоҳ шудан аз таърихи гузаштаи худ, инчунин дарси зиндагӣ мебахшад», -мегӯяд Гавҳар Сайфиддинова.

Ба зикри ҳамсуҳбати мо, китоб дар ҳаёти инсоният нақши бориз дошта, сарчашмаи ба камол расидан ва маърифатноку хирадманд шудан мегардад. Аз ин рӯ Гавҳар Сайфиддинова ҳамчун омӯзгор изҳор медорад, ки бояд ҳамеша талош бар он кард, ки наврасони мо ба китобхонӣ ҳамеша шавқу рағбат дошта бошанд. Меҳри китобро аз хурдсолӣ дар дилашон ҷой диҳанд, то кӯдак фаҳмад, ки китоб чист ва ба ӯ чӣ дода метавонад.

«Ман тӯли ду сол аст, ки дар ин озмун иштирок дорам ва фикр мекунам, ки иштирокчиёни имсола нисбат ба солҳои қаблӣ куллан фарқ доранд. Зеро онҳо аллакай камбудиҳоеро, ки соли гузашта ба онҳо роҳ дода буданд, тавассути мутолиаи зиёд ислоҳ кардаанд. Рисолати озмун ҳам дар ҳамин зоҳир мегардад»,-гуфт ӯ.

АКС: Китобхонаи миллии Тоҷикистон

Декабрь 13, 2022 16:06

Хабарҳои дигари ин бахш

«ИЛМ-ФУРӮҒИ МАЪРИФАТ». Донишу маърифат ба аҳли башар бузургӣ ва хушбахтӣ меоранд
Президенти Тоҷикистон: «Ба хотири муаррифии ҳарчи бештари таъриху фарҳанги миллӣ сохтори алоҳидаи давлатӣ – Агентии ҳифзи мероси таърихиву фарҳангӣ таъсис додем»
Эмомалӣ Раҳмон: «Дар давраи соҳибистиқлолӣ зиёда аз 100 ёдгории таърихиву фарҳангӣ тармиму барқарор гардид»
Озмуну фестивали ҷумҳуриявии «Кадбонуи беҳтарин» ва «Сад ранги чакан» ҷамъбаст мешаванд
Дар Душанбе Мактаби байналмилалии театрии Александринский баргузор мешавад
Дар боғи фарҳангӣ-фароғатии шаҳри Истаравшан бо баландии 12 метр муҷассамаи бунёдгузори давлати тоҷикон шоҳ Исмоили Сомонӣ қомат афрохт
НАВОИ ДӮСТӢ. Дар Душанбе намояндагони Консерваторияи давлатии Узбекистон табодули таҷриба менамоянд
«ТОҶИКОНА МЕПӮШЕМ!». Ба бар намудани либоси миллӣ арҷ гузоштан ба миллату фарҳанг аст
«САД РАНГИ ЧАКАН». Дар Ҳисор даври шаҳрии фестивали ҷумҳуриявӣ ҷамъбаст гардид
«САЙРИ ГУЛИ ЛОЛА». Дар Бадахшон ин озмуни гулҳо ҷамъбаст гардид
«ТОҶИКОНА МЕПӮШЕМ!». Аз ҷониби донишҷӯёни Донишгоҳи байналмилалии забонҳои хориҷии Тоҷикистон намоиши либосҳои миллӣ баргузор шуд
«ПЕШВОИ МИЛЛАТ-ПЕШВОИ НАВРӮЗ». Таҳти ин унвон китоб ба нашр расид