Созмони ҷаҳонии тандурустӣ сатҳи пасти гирифторӣ ва фавт аз COVID-ро ба қайд гирифт

ДУШАНБЕ, 09.12.2022 /АМИТ «Ховар»/. Давоми як ҳафта гирифторӣ ба коронавируси COVID-19 дар ҷаҳон 3% ва фавт бар асари он 17% коҳиш ёфтааст. Тавре АМИТ «Ховар» иттилоъ медиҳад, дар ин бора дар бюллетени ҳафтаинаи эпидемиологии Созмони ҷаҳонии тандурустӣ (СҶТ) гуфта мешавад.

Аз 28 ноябр то 4 декабр сатҳи гирифторӣ ба коронавирус дар ҳамаи минтақаҳо, ба истиснои Амрико, ки дар он 14% зиёд гардидааст, коҳиш ёфт. Коҳиши бештари шумораи гирифторон дар Африқо (78%) ва Осиёи Ҷанубу Шарқӣ (27%) ба қайд гирифта шудааст.

Танҳо дар як ҳафта дар саросари ҷаҳон тақрибан 2,9 миллион ҳолати нави сирояти коронавирус ошкор гардидааст.

Давоми ҳафта теъдоди фавтидагон бар асари COVID-19 танҳо дар Осиёи Ҷанубу Шарқӣ (3%) каме боло рафта, дар дигар минтақаҳо коҳишёбӣ ба қайд гирифта шудааст. Коҳиши бештари фавт дар Африқо (83%) ва Баҳри Миёназамини Шарқӣ (33%) мушоҳида гардидааст.

Дар маҷмӯъ, давоми як ҳафта дар саросари ҷаҳон тақрибан 7,8 ҳазор фавт бар асари COVID-19 ба қайд гирифта шудааст.

Дар тамоми давраи пандемия дар ҷаҳон беш аз 647,9 миллион ҳолати сирояти коронавирус ва тақрибан 6,6 миллион ҳолати фавт бар асари ин беморӣ сабт гардидааст.

АКС аз манбаъҳои боз