Ҷамъомади методӣ-таълимӣ дар пойгоҳи Донишкадаи ҳарбӣ ба сафарбарии ҷузъу том бахшида шуд

ДУШАНБЕ, 06.01.2023 /АМИТ «Ховар»/. Дар пойгоҳи Донишкадаи ҳарбии Вазорати мудофиаи Тоҷикистон зимни ҷамъомади методӣ-таълимӣ дар баробари баррасии самтҳои муассири фаъолияти корӣ бо дарназардошти пешрафту тараққиёти ҷомеаи муосир, фановариҳои ҷадиди илми ҳарбӣ ва техникаву таҷҳизоти муосири низомӣ, инчунин вазъи ҳарбӣ-сиёсии минақаву ҷаҳон низ мавриди таҳлилу омӯзиши ҳамаҷониба қарор дода шуд. Дар ин бора ба АМИТ «Ховар» дар Вазорати мудофиаи кишвар хабар доданд.

Масъулияти ташкил ва баргузории ҷамъомадро афсарони Ситоди генералии Қувваҳои Мусаллаҳ бар уҳда доштанд.

Сардорони ситод дар замони осоишта ва ҳолати ҷанг вазифаҳои муҳим ва ҳам масъулиятноки низомиро бар уҳда доранд. Аз ин ҷост, ки донишу малакаи касбии худро пайваста дар самти ташкил ва дар сатҳи зарурӣ идора кардани ҷузъу томҳо, омодагии ҷангиву сафарбарии қӯшунҳо, ташкили хизмати қаровуливу тартиботи дохилӣ, риояи интизоми ҳарбӣ ва ахлоқию рӯҳияи ҳайати шахсӣ ва иҷрои бомуваффақияти вазифаҳои дар наздашон буда такмилу тақвият мебахшанд.

Ҳамоиш бо ҷалби сардорони ситоду муовинони онҳо, афсарон оид ба сафарбарии ҷузъу том, намояндагони хадамоти қӯшун ва бехатарии хизмати ҳарбӣ аз тамоми қисму воҳидҳои низомӣ доир гардид.

Ҷамъомади навбатӣ мавзӯи машғулияти афсарони масъули ситодро, ки дар пойгоҳи моддӣ-техникии Донишкадаи ҳарбӣ ба омӯзишу баҳрабардории он фаро гирифта шудаанд, инчунин тартиби самтгирӣ дар маҳал ё самтгирии маҳалнигорӣ, ташкили хизмати қаравулӣ ва тайёрии қаравулҳо, тартиби гузаронидани омӯзиши шаҳрвандони эҳтиётӣ ва дигар мавзӯю масъалаҳоро дар бар гирифт.

АКС: Вазорати мудофиаи ҶТ