БОКС. Варзишгарони тоҷик дар Чемпионати Осиё миёни ҷавонон ширкат мекунанд

ДУШАНБЕ, 17.01.2023 /АМИТ «Ховар»/. 18-26 январ дар шаҳри Бангкоки Тайланд Чемпионати Осиё оид ба бокс миёни ҷавонони то 22-сола баргузор мешавад, ки дар он ҳафт варзишгари тоҷик иштирок мекунанд. Дар ин бора ба АМИТ «Ховар» дар Кумитаи миллии олимпии Тоҷикистон хабар доданд.

Барои ширкат дар мусобиқа 243 варзишгар аз 21 давлати қора сабти ном шудаанд.

Федератсияи бокси Тоҷикистон 6 мард ва 1 занро ба Тайланд сафарбар кардааст:

-57кг – Хусравхон Раҳимов
-60кг – Абубакр Муродзода
-71кг – Довуд Маҳкамов
-75кг – Абдумалик Болтаев
-80кг – Шаҳбоз Ҳаитов
+92кг – Асадбек Маннонов
-60кг – Бибинишастамо Холова

Варзишгаронро дар ин сафар мураббиён Маҳмадҷон Сулаймонов ва Хуршед Абдуллоев ҳамроҳӣ мекунанд. Доварони тоҷик Акмалҷон Абдуллоев ва Меҳроҷ Умаров муҳорибаҳои чемпионатро ҳакамӣ хоҳанд кард.

Аввалин Чемпионати Осиё оид ба бокс миёни ҷавонони то 22-сола моҳи январи соли гузашта дар Тошканди Узбекистон баргузор шуда буд, ки дар он варзишгарони мо 11 медал, аз ҷумла 1 тилло ба даст оварданд.

АКС: КМО Тоҷикистон